Siglir tar il cuntegn

Header

cuntegn

Zona cotschna Bloccadas extendidas sin l'entira Italia

Pervi da la crisa da corona ha la regenza taliana extendì las bloccadas e las restricziuns da la libertad da sa mover sin l'entir pajais.

I na saja da perder nagin temp per franar ch'il virus sa derasia vinavant, ha ditg il primminister Giuseppe Conte il glindesdi saira. Fin ils 3 d'avrigl èn scumandadas tuttas radunanzas publicas e tuttas occurrenzas da sport, uschia er il campiunadi da ballape. Er scolas ed universitads restian serradas fin lura.

Pertutgads èn 60 milliuns umans. Conte ha appellà a la populaziun taliana da restar a chasa sch'els n'hajan betg dad ir a lavurar. Pir la fin d'emna aveva la regenza taliana declerà la Lombardia ed ulteriuras 14 provinzas dal nord sco zona cotschna.

Entant ha l'Italia bunamain 10'000 infectads dal coronavirus, passa 460 persunas èn gia mortas.

Tirol dal Sid aveva decidì da serrar las portas

audio
Per tadlar curt e cumpact
ord Novitads dals 10.03.2020. Maletg: Reuters
laschar ir. Durada: 36 Secundas.

Anc avant che la regenza aveva decidì d'extender las bloccadas e las restricziuns da libertad, en l'entir pajais, avevan las pendicularas ensemen cun l'hotellaria gia decis da terminar la stagiun da skis a partir dals 11 da mars, en in act solidaric.

Questa decisiun vegn dals responsabels da las pendicularas e da l’hotellaria sezs. La regenza da la provinza da Bulsaun salida questa decisiun voluntaria, uschia scriv'ella en ina communicaziun sin la pagina uffiziala.

Ils gestiunaris da las pendicularas ensemen cun ils hotels, vulan cun questa mesira sustegnair il cumbat encunter la derasaziun dal coronavirus.

RTR novitads 18.00

Artitgels legids il pli savens