La fiduzia dals utilisaders ch'hajan affidà lur datas a Facebook saja vegnida blessada, ha ditg Zuckerberg. El ha sa perstgisà ed annunzià mesiras per proteger meglier las datas dals utilisaders. Tge sbagls che Facebook ha fatg, n'ha Zuckerberg dentant betg tradì.
Ma er Facebook sez saja vegnì cugliunà. Cambrige Analytica saja vegnida illegalmain tar las datas dals clients. La firma haja l'obligaziun da proteger las datas dals utilisaders da Facebook. Sch’ella na saja betg buna da far quai, n’haja ella era betg merità dad offrir ses servetschs als utilisaders. Quai ha declerà Zuckerberg envers CNN.
Cambridge Analytica ha para rimnà infurmaziuns da milliuns dad utilisaders da Facebook e duvrà quellas per il cumbat electoral dal president american Donald Trump. Zuckerberg ha ditg ch’el saja pront da prender posiziun davart l’incident davant il congress american e dad acceptar regulaziuns pli severas.
RR novitads 06:00
