Siglir tar il cuntegn

Header

cuntegn

Exteriur Zuckerberg vul pli severas reglas per l'internet

L'internet dovria novas reglas per pudair mantegnair il bun. Da quest avis è il schef da Facebook, Mark Zuckerberg.

Sco Mark Zuckerberg scriva en ina contribuziun en la Frankfurter Allgemeine Sonntagszeitung e la Washington Post stoppian las regenzas e las autoritads da regulaziun surpigliar ina rolla pli activa.

Nus stuain fixar novas reglas per l'internet, per pudair mantegnair il bun.
Autur: Mark Zuckerberg schef da Facebook

Per exempel vul Zuckerberg ch'utilisaders possian prender lur datas cun els sch'els midian d'in servetsch a l'auter. Perquai stoppian ins dentant reglar, tgi che saja responsabel per la protecziun da las infurmaziuns.

Blera critica da Facebook

Er tar mesiras cunter manipulaziun politica vesa Zuckerberg deficits tar las regulaziuns. Zuckerberg è da l'avis ch'ils sistems fissan pli effizients sch'i dess standards unitars per verifitgar acturs politics.

Leschas per reclama politica en l'internet sa concentreschan en emprima lingia sin candidats ed elecziuns empè da temas politics che polariseschan la societad.
Autur: Mark Zuckerberg schef da Facebook

Plinavant dettia reglas che valian be durant il temp da cumbat electoral. Campagnas da desinfurmaziun dettia dentant er ordaifer quest temp. Tenor l'avis da Facebook duessan talas leschas vegnir actualisadas per pudair tegnair pitg a las smanatschas realas.

Facebook vegn adina puspè crititgà

La plattafurma da Facebook vegn adina puspè crititgada perquai che utilisaders derasan savens messadis plain odi. Sco ultim ha l'attentader da Christchurch en Nova Zelanda transmess sia attatga live sur Facebook. Tar l'attatga eran 50 persunas mortas. Plinavant è la plattafurma vegnida malduvrada per manipular elecziuns. Protecturs da datas crititgeschan plinavant fermamain che Facebook rimna massivamain datas persunalas da ses utilisaders.

RR novitads 06:00

Artitgels legids il pli savens