La regenza grischuna vul purschidas per la tgira d'uffants er ordaifer il temp da scola, vul dir durant las vacanzas da scola. A geniturs gidass quai da cumbinar famiglia e lavur. Era faschess quai pli attractiv il Grischun sco lieu d'abitar e lavurar per famiglias.
Fin uss mo fin 5 onns
Las leschas ed ordinaziuns vertentas prevesan actualmain sulettamain per uffants enfin tschintg onns ina purschida da tgira durant l'entir onn, pia independent dal temp da scola. Cura ch'ils uffants èn en la vegliadetgna da scolina e scola datti talas purschidas sulettamain da glindesdi fin venderdi e durant las emnas da scola. Las 13 fin 14 emnas da vacanzas n'èn betg inclusas. La regenza fa era attent ch'ina purschida durant las vacanzas muntass dabler lavur per las singulas scolas. Er l'uffizi da scola stuess survegnir dapli daners e persunal per realisar la purschida extendida.
La basa legala necessaria, propona la regenza da stgaffir en il rom da la revisiun parziala da la lescha da scola ch'è en lavur. Il departement d'educaziun quinta, sche tut va sco previs, ch'il Cussegl grond po tractar la revisiun durant la prima mesadad dal 2024.
