Fertant ch'il zercladur è stà fitg bun per ils bogns averts dal Grischun, han la plievgia e las temperaturas fraidas il fanadur procurà per bogns quasi vids.
En ils bogns averts da Scuol e Pany en il Partenz vegnian durant ils dis da trid'aura surtut ils nudaders la damaun ed ils giasts da vacanzas cun lur uffants – gnanc exnum per far bogn, mabain simplamain per ir sin la plazza da gieus.
Nus vain in parc cun trampolins dad aria e quel gira bain. Ils uffants vegnan era sch’i plova. Igl è uschia che nus vain entras quai anc in zic glieud en il bogn avert.
Cumpareglià cun l'onn passà, hajan ils bogns averts dumandads (Arosa, Glion, Pany, Scuol e Tusaun) cunzunt gì pli pauca glieud durant las emnas da vacanzas da stad. Il bogn avert a Glion ha fin uss registrà bunamain in terz pli paucas entradas che durant ina normala stagiun da stad.
Anc hajan ins dentant la speranza ch'in pèr emnas chaudas l'avust possian cumpensar il schlet fanadur. Sch’i vegnia puspè pli chaud, s'auzia era la temperatura da l'aua puspè. Quai saja oravant tut impurtant per ils bogns ch'èn situads pli aut u per ils bogns da lai, sco quel ad Arosa.
Sche l’aura vegn puspè in zic pli stabila, lura ves’jau ina chaussa positiva. Lura marscha qua puspè insatge fin la fin avust.
Il bogn avert a Tusaun quinta schizunt da prolungar la stagiun fin settember. Ins saja flexibel ed uschè ditg che l'aura resta bella, resta er il bogn avert.
Co èsi uss – forsa en la Badi Sand a Cuira?
19 grads ha l'aua betg stgaudada. Gia avantmezdi da mesemna hai gì intgins visitaders en il bogn liber.
Las persunas ch'eran al lieu sajan quellas che vegnian regularmain per il sigl en l'aua. Per ch'i dettia ina fulla glieud duvrassi dentant temperaturas pli autas.
