Il motiv daco che la natira è cunzunt durant l’atun interessanta dependa da plirs facturs, declera Jürg Ackermann da SRF Meteo. Ils pli enoncuschents fenomens en survista:
Sulegl pli bass
Cuntrari a la stad stat il sulegl durant l’atun pli bass. Durant la stad stat il sulegl quasi vertical al palantschieu. Durant l’atun sa mida la posiziun dal sulegl e splendura en in angul pli bass. Quai chaschuna che las sumbrivas (p.ex d’ina planta) vegnan tratgas per lung. Sper quai mida la feglia la colur e crodan giu da planta: Quai mix chaschuna in spectacul da colurs.
Vista lunga
Tar buna aura poi esser ch’ins vesa l’atun pli lunsch da la val en. Quai ha medemamain da far cun l’angul dal sulegl. Durant la stad, nua ch’ils radis da sulegl èn pli ferms, sa stgauda la terra pli fitg e vegn uschia da trair l’umiditad ord dal palantschieu. Quels daguts d’aua van lura en l’aria e creeschan brentina. Quai impedescha ch’ins vesa lunsch. L’atun na po il sulegl betg stgaudar uschè ferm.
Dapli vent
L’atun porta era fenomens ch’èn damain paschaivels. Per exempel èsi da remartgar dapli vent intensiv. Cuntrari a l'enviern datti durant l’atun grondas differenzas da temperaturas tranter il nord ed il sid da l’Europa. Per gulivar quellas zonas da pressiun auta e bassa sufla il vent spezialmain ferm.
Nivels da la damaun
Era ch’i dat dapli nivels intensivs da la damaun ha da far cun il sulegl. Durant l’atun èn las notgs cleras ed adina pli fraidas. Savens vegni enturn il palantschieu uschè fraid che l’umiditad da l’aria condensescha. Sche las temperaturas creschan puspè durant il di, lura sa schlian quests nivels.
Ord l'archiv:
Il Minisguard ha declerà ils fenomens en in'episoda da l'onn passà.
