Siglir tar il cuntegn
Inhalt

Emprim d'avust 2016 Viadi da quatter tar in

Quest onn sa rendan Maria Victoria Haas, Sven Epiney, Clarissa Tami e Jean-Marc Richard a Berna per festivar l'emprim d’avust. Cun velo, tren u bastiment traversan els las regiuns las pli bellas da la Svizra – avant che s’entupar a Berna envidads d'ina persunalitad da renum da la citad federala.

Sven Epiney (SRF), Maria Victoria Haas (RTR), Jean-Marc Richard (RTS) e Clarissa Tami (RSI) poseschan per ina foto sin ina terassa. Davontiers stat Maria Victoria Haas.
Legenda: Da dretg a sanester: Sven Epiney (SRF), Maria Victoria Haas (RTR), Jean-Marc Richard (RTS) e Clarissa Tami (RSI) RTR
Maria Victoria Haas en top cotschen davant ina plonta. vid la plonta pendan dus lampions rodunds cotschens. Els pendan dretg e sanester dal chau da Mari Victoria Haas. Cun ses mauns tegn ella ils lampions.
Legenda: La moderatura Maria Victoria Haas RTR

Suenter avair frequentà l'onn passà l'Älggi-Alp, il center geografic da la Svizra, tutga ussa a la citad federala d’esser la tribuna per las festivitads da l'emprim d’avust. Berna vegn ad esser il lieu d’inscunter dals quatter animaturs che sa preparan per in nov viadi tras las regiuns las pli remartgablas da la Svizra. Sin lur gir cruschan els la via da scolars entusiastics, da numerus amaturs da la cuntrada e natira e da persunas vairamain passiunadas per lur professiun, tuts pronts da mussar ils stgazis zuppads en lur regiun.

En Claustra

En la claustra da renum mundial San Jon a Müstair entschaiva il viadi da Maria Victoria Haas. Là dastga ella visitar las mungias da clausura. Suenter in trekking cun lamas riva ella en il God da Tamangur, in lieu mistic cun ina gronda forza simbolica per ils Rumantschs. A S-charl emprenda Maria Victoria a far in sgraffito, avant che ses viadi cuntinua en direcziun da Tarasp. Là sa scuntra ella cun Snook alias Gino Clavuot. Il rapper rumantsch n`è betg vegnì cun mauns vids, mabain cun sia nova chanzun «Las valischs». Co ch'ins tegna quacras è il tema a S-chanf, avant ch’igl è lura dad ir en l’aria.

Epiney surviva en il guaud

Sven Epiney accumpogna ina classa da la scola da Seelisberg per la festa da giubileum «Via da la Svizra» al Rütli. Sin il bastiment inscuntran els il cusseglier federal Alain Berset. Sin la plazza aviatica da Dübendorf entaupa Sven la bognera la pli sperta dal mund, ina sutga da biro che va cun injectur e lur inventaders. L’ustaria da muntogna Aescher vala sco in dals lieus ils pli spectaculars dal mund. A chaschun da sia visita po Sven gist gidar en cuschina. Per finir absolva el in trenament da surviver en il guaud, emprenda a far fieu ed a tschertgar nutriment.

A bord dal Pilatus

In viadi captivant en la Svizra taliana en cumpagnia da Clarissa Tami che tschertga lieus fascinants, curiusitads e persunas passiunadas. In viadi che parta en il Mendrisiotto, maina tras cuntradas da siemi ed innovaziuns tecnologicas, per finir en il tschiel sur la Leventina cun la patruglia da sgol acrobatic «P3 Flyers». Clarissa passa a Curzútt, ina vischnanca reanimada grazia ad ina visiun ed ina gronda amur per la cuntrada, e fa era ina visita en il Grischun talian, nua che la passiun per la folclora svizra e las tradiziuns vegnan ad esser ils protagonists.

Trens da miniatura

Circumdà da scolars vallesans va Jean-Marc Richard a bord dals trens da miniatura renumads dal Bouveret per tschertgar las pli bellas regiuns da la Svizra romanda. El traversa a pe il Bisse de Savièse (in vegl indriz da sauar), fa ina visita al Museum da las vignas e dal vin en il chastè d’Aigle, nua ch'el fa l'enconuschientscha dal cumpositur vadais Michel Hostettler. Suenter avair explorà il reservat natiral Les Grangettes, sa dirigia el a bord d'ina veglia nav a vapur vers Montreux. La davosa etappa è ina scuntrada a Cerniat en il chantun da Friburg cun Judith Baumann, la scheffa da cuschina spezialista per plantas. In gir da gurmant per gustar las festivitads dal 1. d'avust!

Suenter avair traversà las quatter regiuns linguisticas da la Svizra èsi ura e temp per las festivitads a Berna! L’emissiun preschentada dals quatter moderaturs savais vus guardar l'emprim d'avust 2016.

L'emprim d'avust

L'emprim d'avust
  • las 20:10 sin SRF1
  • las 20:35 sin RTS Un
  • las 20:45 sin RSI – LA1