La firma da tecnologia Integra Biosciences che lavura sin livel internaziunal ha fatg l'emprima badigliada per ses campus. La fatschenta investescha passa 100 milliuns francs en sia sedia a Zezras. Fin il 2028 duai dar 250 novas plazzas da lavur. Tut en tut duai lura dar in plaz d'innovaziun e producziun per 400 collavuraturas e collavuraturs.
Dapli producziun ma er innovaziun a Zezras
Fin uss vegnivan divers products da la fatschenta sco p. ex. piz da pipettas producids be a la sedia en ils Stadis Unids da l'America a Hudson, New Hampshire. Da nov duai quai era capitar a Zezras en ina producziun moderna, fermamain automatisada e sur 24 uras. Plinavant duai dar in deposit aut, automaitsà per ils products finids.
Sper la producziun vul la firma però er crear in spazi per innovaziun e creativitad. Previsas èn er zonas publicas da biro, da collavuraziun, da marketing, d'informatica, da svilup e d'administraziun. Latiers duai er dar in agen labor per tests scientifics ed in'ustaria.
«In ferm signal ch'ins craja vid il lieu grischun»
Per il minister d'economia, Marcus Caduff, è l'investiziun da la firma en la sedia a Zezras in ferm signal ch'ins craja en il lieu grischun sco lieu da lavur e lieu da habitar e da producir. Quai mussia però er ch'il Grischun possia concurrenzar er cun autras regiuns en Svizra u internaziunalmain e ch'ins na stoppia betg sa zuppar.
