![purtret dal töff che giascha en il prà. Sin via èn da vesair las ambulanzas e la polizia.](https://www.rtr.ch/static/cms/images/960w/dea895.jpg)
In giuven da 18 onns è stà da viadi enturn las 15:00 sco ultim d'ina gruppa da trais cun töffs. Els eran da viadi da St. Luzisteig direcziun Balzers. Il medem mument è in giuven da 20 onns charrà cun ses töff en direcziun cuntraria. En la storta lunga tar Pradwisa èn ils dus motociclists collidads. Il giuven da 18 onns è restà cun ses töff sin la via, fertant che l'auter è sa tschentà dasper via en in prà. Omadus motociclists èn vegnids blessads e transportads cun duas ambulanzas en l'Ospital chantunal dal Grischun a Cuira.
La via è stada serrada durant radun duas uras. Ils töffs èn omadus donnegiads ferm. La Polizia chantunala sclerescha anc ils detagls.