Siglir tar il cuntegn

Header

audio
Il program ed ils giasts dal WEF
Or da Actualitad dals 18.05.2022.
abspielen. Laufzeit 3 minutas 45 Sekunden.
cuntegn

Forum mundial d'economia La guerra en l'Ucraina en il center

En il center dal Forum mundial d'economia stat quest onn la guerra en l'Ucraina. Il president ucrainais Wolodimir Selenski vegn a tegnair in pled via video en il center da congress. Vitali Klitschko, il president da la citad da Kiev, vegn ad esser avant lieu a Tavau.

Era il chancelier tudestg Olaf Scholz, il secretari general da la NATO Jens Stoltenberg e la presidenta da la cumissiun europeica Ursula von der Leyen vegnan al WEF a Tavau che cumenza la dumengia. En tut vegnan 2'500 persunalitads da la politica, economia e societad a sa rimnar a Tavau. Tranter quels èn 50 presidents e presidentas da stadis.

Sper la guerra en l'Ucraina duai vegnir discutà davart la crisa da clima, la crisa d'economia, l'inflaziun, l'inegualitad e la crisa da corona ad esser ils temas davart quels ch'i vegn discutà en divers panels.

Quatter demonstraziuns cunter WEF

Ils 50 demonstrants e demonstrantas per il clima ch’èn ier sa mess sin via a Küblis, èn arrivads oz suentermezdi a Tavau. Els crititgeschan il WEF cun vehemenza. Ils organisaturs da la demonstraziun han dentant quintà cun dapli participantas e participants. Ils demonstrants pretendan che la natira e l’uman stettian puspè en il center da l’economia e betg il profit. Tenor els èsi er uschia che mo ils «ritgs» vegnian a pled al Forum mundial d’economia. Er als demonstrants dals Giuvens socialists ch’han demonstrà ensemen cun ils activists dal clima, n’han betg pudì attrair dapli glieud. Omaduas demonstraziuns èn stadas lubidas.

La vischnanca da Tavau ha lubì quatter demonstraziuns durant il Forum mundial d'economia.

Foto da demonstrants
Legenda: L'onn 2019 avevan ils demonstrants organisà in marsch da protest a Landquart. RTR, Anna Selina Quinter

La terza demonstraziun è planisada gliendisdi avantmezdi a Tavau. I giaja per sustegnair il primminister da la Cambodscha, hai num en la communicaziun. Detagls davart quest'acziun organisada da l'ambassadura da la Cambodscha n'èn betg enconuschents.

La quarta demonstraziun è l'ultim di dal WEF. Tar quella sa tracti d'ina demonstraziun da la chauma dal clima da Tavau – er quella cun maximalmain 500 persunas a Tavau.

Lubì las demonstraziuns ha la suprastanza da Tavau – ordavant vegnan quellas mintgamai controlladas da la regenza grischuna e da la polizia chantunala.

RTR novitads 15:00

Artitgels legids il pli savens

Scrollar a sanestra Scrollar a dretga