Anc avant in onn ha la gastronomia grischuna spetgà in'unda da concurs. Quai aveva Gastro Grischun scrit en ina brev averta a la regenza grischuna ed al Cussegl federal. Entant bilantschescha il president da l'uniun tetgala, Franz Sepp Caluori envers il schurnal regiunal da SRF ch'i n'haja betg dà dapli concurs che avant la pandemia. Ils pajaments dal chantun hajan salvà blers manaschis. Intgins stoppian anc pajar enavos ils credits ma tut en tut sajan ins vegnì fitg bain atras la pandemia.
Sustegn da radund 70 milliuns francs
La gastronomia grischuna saja vegnida sustegnida finanzialmain cun radund 70 milliuns francs. L'entschatta saja la pandemia bain stada in schoc. Dentant saja ella era stada ina schanza per la gastronomia. Uschia hajan blers manaschis realisà ch'els possian funcziunar cun pli pauc persunal e ch'els stoppian adattar lur purschida per puspè scriver meglras cifras.