La malsegirtad davart tge che capita puncto Corona l'atun che vegn, fetschia quitads ad el, di Franz Sepp Caluori. «Las ustarias na dastgan betg pli vegnir sarradas e las distanzas endadens ston vegnir reducidas», pretenda el. Mintga ustaria haja endadens anc tschintg enfin diesch maisas be sco decoraziun, perquai che las distanzas stoppian vegnir resguardadas.
Il mument possian quests plazs per part anc vegnir cumpensads cun las terrassas. Ma gist tar las ustarias cun be ina pitschna u nagina terassa na giaja quai era tar bun'aura betg bain. Per l'atun e l'enviern giavischa il gastronom che blera glieud – era la glieud giuvna – sa laschia vaccinar. «Uschia pudessan nus entschaiver normal la stagiun d'atun», spera Franz Sepp Caluori.