Siglir tar il cuntegn

Header

cuntegn

Giuvens talents da musica Sunar cun la filarmonia da chombra grischuna

Uschè blers talents giuvens sco anc mai èn sa preschantads a la concurrenza per talents grischuns. Ils megliers musicists a musicistas survegnan la pussaivladad da sunar in concert cun la filarmonia da chombra grischuna. Da la partida era er il trumbettist da 13 onns Simon Gabriel da S-Chanf.

Quest onn hajan els schlargià la pussaivladad per giuvenils da sa preschentar avant la giuria professiunala. 15 talents grischuns han piglià la chaschun ed han sunà avant en la scola da musica a Cuira. Ils giuvenils han mintgamai diesch minutas temp per sunar avant la giuria. Suenter la preschentaziun survegnan els in curt resun. Ils instruments che vegnan preschentads sajan fitg variabels: gìa, oboa, clavazin, cello, flauta traversa e trumbettas datti d'udir.

I vegn a vegnir fitg grev da decider tge talents che pon sunar il concert cun la filarmonia da chombra grischuna. Ils giuvens che sa preschentan èn tuts fitg talentads.
Autur: Mengia Demarmels ina da las organisaturas

Il concert cun la filarmonia da chombra grischuna vegn ad avair lieu la stad en il teater da la citad a Cuira.

Trumbettist da S-Chanf

In dals talents ch'è sa preschentà è il trumbettist da 13 onns, Simon Gabriel da S-Chanf. Dapi ch'el ha cun sis onns cumenzà a sunar la trumbetta è l'instrument sia gronda passiun. Cun diesch onns era el daventà il pli giuven commember da la Brass Band da giuvenils naziunala. Avant dus onns ha el dastgà ir sin turnea cun il «Neues Zürcher Orchester» ed ha sunà tranter auter a Berlin e Minca. In zic gnervus saja el schon stà avant la preschentaziun, ma i saja ì bain.

Jau hai survegnì in resun da la giuria, jau prend encunter quels tips ed emprov da far il meglier ordlonder.
Autur: Simon Gabriel trumbettist giuven

Sch'el na suna betg gist la sia trumbetta u danovamain era anc il clavazin, dat el gugent pingpong u ballape ed el dissegna gugent. Ses pli grond siemi saja da pudair ir a studegiar musica e daventar scolast da musica.

Da pudair sunar in concert cun la filarmonia da chombra grischuna fiss ina grond'onur per mai.
Autur: Simon Gabriel trumbettist giuven
mattatsch blond cun chamisch'alva e bula cotschna. el embratscha ina trumbetta
Legenda: Simon Gabriel La trumbetta è sia gronda passiun. RTR, Giana Maria Cantieni

Ord l'archiv:

video
Lions-Preis
Or da Cuntrasts dals 10.04.1994.
abspielen. Laufzeit 4 minutas 6 Sekunden.

RTR actualitad 08:00

Artitgels legids il pli savens

Scrollar a sanestra Scrollar a dretga