Il forum d'interprendiders giuvens grischuns tscherna mintg'onn las pli innovativas ideas e fatschentas da startup. Gia per la novavla giada è il premi vegnì surdà ier saira. Pudì s'annunziar han tut las interpresas ch'èn pli giuvnas che 5 onns ed han lur sez en il chantun Grischun. Il victur ha survegnì la trofea «premi d'interprendiders giuvens Grischun 2021» ed ina summa da premi da 3'000 francs. Da quels ha la giuria selecziunà trais finalists: la Conarch GmbH, la Muntagnard AG e la Rivet Maté (Supportyourlocals GmbH). Davart quels ha mintgin e mintgina pudì eleger online, la votaziun dal publicum ha fatg ora in terz da la decisiun.
Conarch GmbH – «interprendider giuven grischun 2021»
La firma Conarch dals dus giuvens Luka Došen e Robin Gemperle ha gudagnà il tetel sco «interprendider giuven grischun 2021.» Lur product è ina software «Conarch Maps» che rimnà datas da parcellas en il chantun Grischun e simplifitgescha uschia da tschentar dumondas da bajegiar. L'idea per quest product è vegnida a Luka Došen avant trais onns cu el ha gì be 20 onns, cunquai ch'el lavurava sez sco dissegnader da construcziun auta ed aveva sez savens avunda stuì tscherner tut las infurmaziuns da las differentas funtaunas. Cun Robin Gemperle ch'el enconuscheva gia da pitschen e ch'è informaticher haja el chattà la dretga persuna per fundar lur start-up. Lur emprima versiun dal product è vegnida il mars sin la fiera. Per il futur vulan els dentant sviluppar vinavant il product ch'el funcziuneschia per l'entira Sviza e betg be per il chantun Grischun.
Restar vidlonder è l'A ed O
Era ils dus giuvens da Conarch hajan adina puspè gì da cumbatter cun sfidas durant il svilup da lur product ed uschia adina puspè stuì sa motivar da restar vidlonder. Tenor Fabio Aresu da la Markenkern AG che organisescha il forum per interprendiders giuvens e cusseglia firmas e start-ups, saja quai in dals puncts centrals sch'ins lantscha in start-up. Blers sutschazzegian tge ch'i veglia dir d'avair sez ina fatschenta, esser l'agen schef ed esser responsabel per collavuraturs e collavuraturas. Per avair success stoppian ins restar vidlonder, avair in bun product ch'è digital, persistent e nizzaivel e pudair ir enturn bain cun las finanzas.
