Il model directiv per il turissem da sanadad, ch’il chantun ha publitgà oz, è la basa strategica per rinforzar e nizzegiar il potenzial da l’economia regiunala dal Grischun.
Uschia vegn realisà il punct central «Turissem da sanadad» – che la regenza aveva definì en ses program 2017 fin 2020. Sco il chantun scriva, vegn il turissem da sanadad vesì sco martgà da l’avegnir per il Grischun. Tenor il model directiv vul il chantun nizzegiar il potenzial en ils secturs «prevenziun», «restricziuns da la mobilitad» e «possessuras e possessurs dad abitaziuns da vacanzas».
Elavurà il model directiv ha ina gruppa directiva cun 16 represchentantas e represchentants dals secturs sanadad, turissem, perscrutaziun, economia ed administraziun.
Finamira dal model directiv
La finamira dal model directiv saja da svilupar vinavant las purschidas da turissem e da sanadad ch'èn gia existentas. E far quellas puspè pli attractivas ed enconuschentas. Il chantun Grischun saja cun ses provediment da sanadad decentral, qualitativ e d'auta qualitad sco era cun l'avantatg agricul e turistic in lieu optimal per promover il turissem da sanadad. Quai ha ditg oz a las medias, il manader da la gurppa directiva Philipp Gunzinger.
Remplazzar il turissem existent dal Grischun, na vul ins cun questa purschida betg. Cun ina tala purschida vul ins cumplettar las stagiuns bassas, sco era pussibilitar dapli plazzas en il sectur da sanadad e turissem. Il turissem da sanadad è per il chantun ina nischa e duess dar ina purschida supplementara.
Igl è clar ch'igl è per il chantun Grischun ina nischa e ch'ins vul cumplettar cun quai il turissem existent.
Il public èn mira èn en prima lingia persunas svizras, èn in segund pass vul ins alura era cuntanscher persunas internaziunalas. Il turissem da sanada saja adina pli tschertgà, cunquai ch'il trend da guardar da sasezza e la sanadad crescha vinavant, ha declerà oz la presidenta da la cumissiun Yvonne Brigger-Vogel. Cun in video fatg per il turissem da sanadad spera la cumissiun da pudair sa drizzar a Svizras e Svizzers.
Ord l'archiv
Sanadad e turissem è gia dapi plirs onns in tema ch'occupa il Grischun.