La SELVA saja stada in pass impurtant per proteger il guaud, di il president Leo Thomann. Ina sfida eran las runcadas e la tema da la muria dal guaud. La branscha forestala era vi da sa transfurmar, cun l’industrialisaziun e las novas maschinas da pinar plantas.
Il guaud crescha
La SELVA s’engascha per ils interess dals possessurs da guaud e dals producents da lain, ella cusseglia dentant era vischnancas. 30 pertschient da la surfatscha grischuna è guaud e mintg’onn vegnan vitiers 1’400 hectaras, quai èn radund 2’000 plazzas da ballape.
Sfidas modernas
Ils ultims onns è la SELVA stada occupada fermamain cun fusiuns da vischnancas. Da 220 vischnancas giu sin radund la mesadad munta natiralmain era midadas tals reviers forestals. In tema regular è il bau scorsa, ed era la midada dal clima smanatscha cun consequenzas per il guaud. In ferm e saun guaud è impurtant per evitar catastrofas da la natira.
In grond giavisch
Per il futur vuless la SELVA sustegnair vinavant ils possessurs da guaud, cumbatter il bau scorsa e proteger ils guauds da protecziun. Ed in fervent giavisch dal president Leo Thomann fiss da pudair utilisar la buna laina da la muntogna en la patria, enstagl dad exportar ella.
RR actualitad 17:00