La chasa da tgira Rigahus (Rigahaus) a Cuira, ha ils davos dis procurà per lingias grassas. Sco la Südostschweiz scriva, han 15 collavuraturas da la tgira visà lur plazzas. Entant han ils responsabels dal Rigahus confermà ad RTR 11 visadas. E sco ch'i tuna, hai dà renfatschas or da la retscha da la tgira envers la direcziun da la chasa. Sinaquai ha era il mainafatschenta Sandro Ursch dà giu sia plazza.
Co èsi vegnì tar quest'unda da disditgas?
Sco la Südostschweiz scriva haja tut cumenzà ils 2 da settember nua ch'il persunal ha surdà ina brev a la direcziun. En quella saja vegnì crititgà ch'il pensum principal dad ina chasa da tgira – pia la tgira sezza – vegnia pli e pli a la curta. Per la gastronomia ed insumma per che tut vesia ora picobello vegnia per exempel dà ora ina massa raps – fertant ch'i manchia en sasez vi da las chaussas essenzialas per la tgira: sco lumpas da sa lavar u era cuvertas.
In'autra renfatscha fuva, che la tgira na vegnia betg involvada en tscherts process decisivs. Plinavant vegnian emprendistas ed emprendists classifitgà sco persunas qualifitgadas cun experientscha en ils plans da lavur – uschia pateschia la qualitad da l'emprendissadi.
Problems da communicaziun vegnian sclerids
La direcziun avess gì temp da respunder a la brev cun la critica entaifer 10 dis – ma quai na saja, sco ch'i para, betg capità. Sinaquai ha RTR confruntà il Rigahus cun quellas renfatschas. La pledadra da medias, Bettina Zimmermann, renviescha questas renfatschas:
Jau vi renviar questas renfatschas. Quellas n'èn betg correctas.
Il cussegl da fundaziun haja stuì constatar che differentas infurmaziuns na sajan betg arrivads fin la basa. E tras quai haja dà malchapientschas. Quellas sajan ins uss vi da sclerir cun il persunal per chattar ina soluziun.
Co vinavant
In svilup hai en mintga cas gia dà en il Rigahus: il cussegl da fundaziun haja chattà in nov manader per la tgira. El cumenzia ses post a partir dal schaner 2026. En il fratemp surpiglian Ursina Voneschen ed Ursula Graf il post da manader da tgira ad interim.
Malgrà las disditgas hajan ins anc avunda persunal per pudair garantir vinavant la tgira dals cussadents e las cussadentas, punctueschan ils responsabels dal Rigahus. Il president dal cussegl da fundaziun, Thomas Negri, spera ch'ins po entrar en dialog cun las persunas pertutgadas, per puspè rinforzar la confidanza tranter la direcziun ed ils collavuraturs e las collavuraturas - co concret, gliez resta anc avert.
