La Centrala da clom d’agid sanitar 144 dal Grischun è certifitgada. Persunas en situaziun d'urgenza duajan pudair sa fidar ch'ina persuna cumpetenta prendia encunter svelt il clom d'urgenza e ch'ella reageschia a moda professiunala. L’Interassociaziun per salvament haja examinà la centrala en 54 puncts, scriva il chantun.
En tut ils puncts adempleschia la centrala il pli aut standard. La chadaina da salvament per terra, en l’aria ed en l’aua è cun quai garantida en il Grischun. La Centrala da clom d’agid sanitar dal Grischun è occupada 24 uras il di.