Il Grischun controllescha periodicamain, sche las incumbensas publicas èn necessarias, effizientas e finanziablas. Quai prevesa la constituziun chantunala. L’onn passà haja la regenza fatg quai e deliberà en tut 193 mesiras d’optimar, hai num en ina communicaziun. 156 partiziuns èn stadas sut la marella. Betg part da la controlla sajan stadas las dretgiras chantunals sco era las instituziun da dretg public, sco la cassa da pensiun chantunal dal Grischun, la Banca chantunala, ils servetschs psichiatrics dal chantun, l'assicuranza d'edifizis e l'Institut d'assicuranza sociala dal chantun Grischun.
Gia optimà emprimas chaussas
La quantitad d'incumbensas e las pretensiuns qualitativas per ils posts ed uffizis sajan s'augmentadas pli fitg ch'ils meds finanzials e persunals che stettian a disposiziun. Ils ultims onns haja l'administraziun chantunala perquai gia cuntinuadamain optimà process u fatg reorganisaziuns. Sco exempel numna ella restructuraziuns tar l'Uffizi da migraziun e da dretg civil, tar la procura publica u tar l'Uffizi per la scola populara ed il sport.
Mesiras pitschnas e mesiras operativas che possian vegnir implementadas senza grond temp transitoric, vegnian messas en la pratica immediat, mesiras pli grondas dovrian anc ina examinaziun detagliada enfin mez 2023.