Dapi 20 onns datti la marca «Graubünden». Ella duai far pli attractiv il Grischun sco destinaziun d'abitar, vacanzas, cultura u lavur. La marca «Grischun» ha questa incumbensa dal chantun. Mintga quatter onns vegn definì da nov tge finamiras che la marca ha.
Il sustegn da la politica, la cuntinuitad ed ils partenaris che fan part a la marca sajan quai che ha manà tar lur success, di il maina fatschenta Gieri Spescha. Ins saja cuntents cun quai ch'ins haja cuntanschì en quels onns. Ma i dess el futur anc potenzial. Enturn 70 partenaris ha la marca oz. Ins veglia en il futur anc cuntanscher dapli, ma ins na veglia era betg sfurzar insatgi da far part da la marca.
Era il chantun che dat l'incumbensa è cuntent cun il svilup dals davos 20 onns da la marca «Grischun». La gronda sfida saja da porscher ina marca cun valurs che constettian per tuts, uschia cusseglier guvernativ Marcus Caduff. Per quai motiv na saja la finamira era betg che tuttas interpresas fetschian part a la marca. En il futur vesa el potenzial da sa drizzar pli fitg envers autras regiuns che la svizra tudestga, nua che la marca haja gia success. La marca haja potenzial da mussar ch'i saja attractiv d'abitar e lavurar en il chantun Grischun ed uschia sustegnair da la problematica da la mancanza da persunal.
