Il siemi da skiunz d'elita ha Silvano Beltrametti stuì dar si cun l'accident avant 20 onns. Natiralmain haja dà muments, nua ch'i saja stà grev d'acceptar il destin, e nua ch'era la cumpassiun per sasez saja stada pli gronda, di l'um da 42 onns. Ma sia fermezza mentala ch'el ha entras il sport d'elita e la veglia da betg dar si, haja gidà ad el da surmuntar il grev temp.
L'accident dals 8 da december 2001 haja dentant era purtà bler bun, di Silvano Beltrametti.
Jau na vi betg renunziar als davos 20 onns, e tut quellas experientschas ch'jau hai dastgà far, e tut ils bels muments ch'jau hai gì. Jau hai puspè survegnì enavos la cuntentientscha.
Era sch'il sport d'elita è in'impurtanta part dad el, na vesa il Grischun sasez betg mo sco quai. Dapi var15 onns maina el ensemen cun sia dunna l’hotel da muntogna «Tgantieni» a Lai. Esser um da fatschenta d'in hotel fetschia plaschair ed el. El haja il mument la gista professiun.
Il sport accumpogna el vinavant
Guardond sin ils proxims 20 onns vul Silvano Beltrametti dentant far in zichel pli ruassaivel. Quai era perquai ch'el sa, ch'el vegn cun ils onns ad esser corporalmain pli restrenschì, cumpareglià cun persunas che n'èn betg en sutga cun rodas. Perquai vul el cun il temp dar giu intginas incumbensas en l'hotel ed avair dapli temp per sia famiglia, ses amis e ses hobis.
Il sport accumpogna numnadamain anc adina Silvano Beltrametti. Enstagl dad ir cursas da skis va el ussa cun bob a monoski e la stad cun velo ch'el fa ir cun ils mauns.
