Il nov program sa basa sin ils anteriurs programs e preveda en media 193 milliuns francs per onn per construir e mantegnair las vias chantunalas. Sur quatter onns vegn pia investì 771,1 milliuns francs en las vias chantunalas. En congual cun ils quatter onns avant è quai levet pli pauc. Tenor il rapport saja il stan da las vias en general bun, uschia ch'ins stoppia investir pli pauc en mantegniment.
Vitiers prevesa il program era mesiras dal traffic plaun e per l’aglomeraziun. Sco exempel vegn numnà la via da velo da Razén fin Maiavilla. Quella colliescha era l'aglomeraziun enturn Cuira.
Sco ch'i stat scrit en la communicaziun, vegn en il program da vias actual adina era resguardà il «Green deal» – pia l'ecologia. Plinavant èn planisadas mesiras per la protecziun cunter la canera.
Adina dapli traffic
La populaziun en Grischun creschia sutproporziunal, il traffic creschia dentant sur la media, constatescha il rapport. Surtut il traffic da temp liber e vacanzas en Grischun procura per vias plainas – surtut durant la stagiun auta l'enviern e la stad. Vitiers vegn il traffic da transit sur la ruta dal San Bernardino. Sco consequenza guntgeschan blers automobilists sin las vias localas.
Sco ch'i stat scrit en il rapport, lavura il chantun ensemen cun Confederaziun e vischnancas vi da mesiras per optimar il traffic.
Adattà al tema:
