Siglir tar il cuntegn
Inhalt

Grischun 30 nursas sparidas suenter stad si d'alp

Silvana Rosenberg dal chantun Argovia tschertga dapi passa in mais 30 da sias nursas ch'èn sparidas suenter la stad si d'alp en la Tumleastga.

4 nursas, ina ha in cor pinc sil dies
Legenda: Las nursas da Silvana Rosenberg en marcadas cun in cor pinc. MAD, Silvana Rosenberg

Dapi ils 14 da settember sa Silvana Rosenberg che sias nursas en sparidas. Ella e ses collega da lavur possedan ensemen in bain puril en il chantun Argovia. Quest onn han els tramess 215 nursas sin l'alp Urmera en la Tumleastga en il conturn dal Piz Scalottas. Suenter la stgargiada mez settember mancavan però 30 nursas. Gia tar ina dumbraziun l'avust n'eran las nursas betg denturn. Cunquai ch'i era dentant brentina ed er autras nursas mancavan, n'eri betg cler dapi cura che las nursas eran sparidas.

Il mument è quai in sentiment malempernaivel. Ins na sa simplamain betg tge ch'è capità. Ins na sa betg sch'ellas èn propi idas a perder ni sch'insatgi ha forsa schizunt engulà ellas.
Autur: Silvana Rosenbergpura

Facebook sco med per far attent

Suenter che Silvana Rosenberg ha contactà alps en vischinanza, vischnancas, chatschaders, la societad dals veterinaris dal Grischun, mazlers, uniuns da turissem, la polizia e perfin il militar ha ella decis da publitgar sia istorgia en la rait. Sin la plattafurma sociala Facebook ha ella fatg attent sin la spariziun da las 30 nursas. Uschia ha ella gia survegnì emprims indizis nua tschertgar, fin uss dentant senza success. Silvana Rosenberg ha anc adina betg chatta sias nursas.

RR actualitad 07:00