Il plan d'aglomeraziun da Cuira da la quarta generaziun ha cuntanschì in proxim term. La regenza grischuna ha approvà la cunvegna da prestaziun tranter il chantun e la Confederaziun. Vul dir: ils radund 38,5 milliuns francs da la Confederaziun pon vegnir dads liber. Cun quest daners sustegna la Confederaziun projects per meglierar l'infrastructura da traffic en la citad e l'aglomeraziun.
La Confederaziun sa participescha a la finanziaziun da mesiras per meglierar l'infrastructura da traffic en citads ed en aglomeraziuns. Quai sut la premissa ch'in program d'aglomeraziun coordineschia il svilup da l'abitadi e dal traffic cun la planisaziun da la cuntrada. Perquai mettia er il Program d'aglomeraziun Cuira il focus sin quests secturs. Il perimeter cumpiglia las regiuns Plaun, Plessur e Landquart.
Traffic public, vias da transit tras ils lieus e rait da vias da velo en il focus
Las mesiras dal plan d'aglomeraziun sa focusseschan sin fermadas dal traffic public che duain garantir ina midada da transport effizienta, plinavant sin il traffic che duai vegnir pli fluid cun reducir colonnas. In'ulteriura mesira è il meglierament da la rait da vias da velo, per exempel tras ina ruta che collia Razén e Maiavilla.
Cun la cunvegna da prestaziun ch'è ussa vegnida approvada tranter la Confederaziun ed il chantun èn vegnidas stgaffidas las premissas per pajar contribuziuns federalas da var 38,5 milliuns francs. Quai correspunda a 30% dals custs dal plan d'aglomeraziun Cuira. Bleras da las mesiras vegnan realisadas tras las vischnancas. Perquai ch'ils daners federals concedids pon mo vegnir duvrads fin la fin da mars 2029, han la planisaziun da las finanzas e la projectaziun gia cumenzà sin nivel communal.
Proxim program d'aglomeraziun da la tschintgavla generaziun en preparaziun
Las consequenzas dal grond volumen da traffic e da tut ils projects da construcziun restan er en il futur pretensiusas. Las regiuns e las vischnancas che sa chattan en il perimeter da l'aglomeraziun sco er il chantun èn perquai sa decidids d'elavurar in program d'aglomeraziun da la tschintgavla generaziun. Il program na vegnia betg scrit tut da nov, plitost vegnia lavurà vinavant vi dals temas existents. Uschia vegnan cuntinuadas l'optimaziun da las staziuns e la concepziun da vias. En tscherts puncts èn previs novs concepts, sco per exempel mesiras per il traffic da peduns e dapli spazis libers e zonas verdas en ils abitadis.
Las lavurs pertutgant il program d'aglomeraziun da la tschintgavla generaziun hajan cumenzà il zercladur 2023, ina consultaziun tar las vischnancas saja previsa il settember 2024, l'integraziun da la populaziun saja planisada il schaner 2025. L'inoltraziun a la Confederaziun stoppia vegnir fatga fin ils 30 da zercladur 2025.
