I cumenza l'onn 1984 cun ina simpla idea: in pèr giuvens entusiasmads da la giuventegna vulan organisar in festival. Betg a Turitg, betg a Berna – mabain qua, en Val Lumnezia. Datiers da la muntogna, damanaivel da la giuventetgna grischuna.
La giuventetgna Vella è stada ad ina festa da la citad da Lucerna e quai è stà fascinant per nus. E nus ans essan dumandads sche nus pudessan organisar quai er tar nus.
Sin il placat è da leger il lineup da l'emprim open air lumnezian. Sis preschentaziuns èn stadas planisadas da la Svizra, 3 da quellas ord la regiun. Il placat aveva fatg Mathias Derungs sez. El era in dals fundaturs da l'open air.
L'emprima realisaziun è stada in success. L'entrada na custava betg sco oz dapli che 100 francs per in di, mabain «mo» 16 francs. Ina tenda da festa cun ina pitschna tribuna ha attratg var 600 persunas si Davos Munts sur Vattiz, nua ch'ils emprims 10 festivals han gì lieu.
Ils trais chapitels da l'open air
L'entschatta a Davos Munts (1985 – 1995)
Ils emprims onns ha l'open air lieu a Davos Munts sur Vattiz. L'entira acziun dura dentant era mo in di. Bands sco Apaches, The Cut, Bluefingers, Remedy, Hades u Wishbone Ash sa preschentan. La tribuna è pitschna, ils maletgs da la tribuna èn malegiads sez ed i na dat nagin persunal da segirezza.
L'open air 1994 è stà l'emprim che cuzzava dus dis. Perquai èn er pliras bands sa preschentadas, tranter auter la band svizra May Day u l'emprima gruppa da rock lumneziana Obsidian.
Cuntinuaziun a Cuschnaus (1996 – 2005)
Cunquai ch'il lai da far bogn Davos Munts è vegnì construì, ha l'open air stuì tschertgar ina nova plazza. Quella ha il festival chattà a Cuschnaus sut Morissen. Là ha l'open air festivà il giubileum da 20 onns – e RTR ha producì in purtret.
Lura èn sa preschentads er ils emprims gronds stars. Neneh Cherry, Gotthard, Manfred Mann's Earth Band u Jimmy Cliff han sunà durant quest temp sin tribuna a Cuschnaus.
Artists, sco il rapper american Ice-T, eran striunads da la cuntrada muntagnarda. El na saja anc mai stà uschè datiers dal tschiel, ha el annunzià en in'intervista. La band Lunik ha dentant era gì sias experientschas cun la cuntrada muntagnarda grischuna. Durant il viadi èn els ids fallà. Tuttenina èn els stads a Val S. Pieder.
Durant quest temp crescha l'impurtanza dal festival. Adina dapli glieud vul ir a l'open air ed il plaz vegn stgars. Il plaz da tendas sa chatta ussa schizunt gist sper la via principala ed igl è cler: ins sto chattar in nov plaz, in plaz pli grond.
Il pli grond plaz a Degen (2006 – 2025)
Quest nov plaz è era vegnì chattà. A Degen, sper la baselgia da Sontg Benedetg, duai l'open air avair lieu en l'avegnir e porscher plaz a 13'000 persunas. En il vitg datti dentant er glieud ch'è encunter, che ha tema che la val da la glisch daventia la val da la canera.
La fin finala ha l'open air tuttina dastgà avair lieu là ed ha uschia pudì crescher vinavant. Lura na vegnevan betg pli 600 persunas, mabain passa 13'000.
Dapi il 2006 ha lieu il festival a Degen – integrà en la cuntrada, cun vista sin la val. Igl è oz in festival modern cun ina infrastructura che po concurrenzar cun autras occurrenzas grondas. E tuttina: il scharm è restà. Ils ultims onns èn stads sin tribuna tranter auter Lo & Leduc, Loco Escrito, Bligg, Nemo, Stress, Kunz, Nura u Sido. Il stil da musica è sa schlargià – da rock sur pop fin hip hop, adina cun il focus sin la scena svizra ed intgins musicists da renum internaziunal
Ils onns 2020 e 2021 ha l'Open Air Lumnezia dentant stuì vegnir annullà. Il motiv daco ch'il festival aveva per l'emprima giada spustà è stada la pandemia da corona.
Igl è fitg frustrant. Natiralmain èsi logic che l'open air na po betg avair lieu, ma i fa mal.
L'open air ozendi
En il fratemp viagian passa 15'000 fans da musica mintg'onn en Val Lumnezia. L'open air n'è betg mo il lieu d'inscunter dals fans da musica, mabain era in toc identitad per la regiun – cun ina ferma relaziun cun la cultura rumantscha ed in'atmosfera unica. E tuttina: il festival resta famigliar. Blers gidanters èn da la regiun, blers giasts vegnan gia dapi onns. Ed insatge resta: il sentiment ch'ins senta a l'Open Air Lumnezia in zic dapli che mo musica.
L’Open Air Lumnezia 2025
L'open air da quest onn è gia vendì ora, ed ils organisaturs èn cuntents. Bigliets na pon ins anc strusch survegnir.
Gievgia
- 16:00 Any Sabadi
- 17:10 Cossmo
- 18:20 Reviväl
- 19:40 Majan
- 21:30 Patent Ochsner
- 23:30 Drunken Masters
Venderdi
- 14:30 2kmafia
- 16:00 Ikan Hyu
- 17:40 Leila
- 19:40 GReeeN
- 21:50 Hecht
- 23:59 Lost Frequencies
Sonda
- 13:30 Happy For Real
- 14:40 Giganto
- 16:15 L Loko & Drini
- 18:00 Zoe Wees
- 20:00 Dabu Fantastic
- 22:00 Makko
- 23:59 Ofenbach