La Surveglianza grischuna da las fundaziuns ha mess da nov in register electronic da las fundaziuns sin la pagina d'internet da l'Administraziun da finanzas, quai communitgescha il chantun. Persunas interessadas survegnan uschia in access pli facil a las fundaziuns respectivas. Il register ha categorias tematicas ed ins po tschertgar tenor chavazzins.
425 fundaziuns sut surveglianza grischuna
Actualmain stattan 425 fundaziuns classicas cun ina facultad da passa 3,5 milliardas francs sut surveglianza grischuna. Fundaziuns da famiglias e da baselgias na tutgan betg tar las fundaziuns classicas. En l'entira Svizra datti en tut 13'375 fundaziuns d'utilitad publica. 60% da quellas fundaziuns èn vegnidas stgaffidas durant ils ultims 30 onns. La Surveglianza federala da las fundaziuns (ESA) ha era publitgà sin sia pagina d'internet in register da fundaziuns. Quel cuntegna tut las fundaziuns classicas ch'èn sut surveglianza federala, e las fundaziuns pon vegnir consultadas tenor il medem schema sco en il register grischun.
