La fin d'emna dals 9 enfin ils 11 da zercladur è Cuira puspè stada sut l'ensaina da l'art sin via. Per la 8avla giada ha gì lieu il Buskers Festival. La via da la staziun e la citad veglia èn stadas fullanadas da glieud. Famiglias cun uffants e charrotschas, gruppas da giuvenils e pèrins pli vegls.
Per metter en pais il Buskers èn las organisaturas ed ils organisaturs avisads d'entradas per er pudair porscher en futur in festival. Perquai han gidantras e gidanters vendì entradas en furma da bratschlets.
Ina da las voluntarias era Layla Derungs da Trin Mulin. La dunna giuvna da 16 onns gida quest onn per l'emprima giada al Buskers. Ella è stada responsabla per la decoraziun.
Jau chat fitg bel sch'i dat insatge artistic a Cuira, quai manca in pau en questa citad. I fa che viva in pau e quai è fitg bel.
Las artistas ed ils artists ch'èn sa preschentads derivan da l'entir mund. Per exempel dal Canada, l'Argentina, il Giapun e l'Australia per numnar mo intgins. Ma era da la Svizra e da noss pajais vischins.
Mo da l'applaus na pon las persunas che procuran per l'art betg viver. Ils custs per l’alloschi, l'alimentaziun ed ils viadis surprenda il festival. Ma la gascha, damai la paja, decida il public. E quella survegnan las artistas en furma da raps en ils chapels.
Er artistas ed artist culinarics han fatg part dal festival. Sin l'entir areal èn stads parcads foodtrucks – damai bussins or da quals che vegniva servidas spezialitads da l'entir mund per dustar fom e said. E tar ils plats e bitgers reutilisabels hai dà in sistem da depo.
Il comité d'organisaziun ha gì quest onn in pau fadia da chattar persunas che gidan. Il manader dal festival, Christoph Sprecher, manegià dentant tgi saja ì si la finala. Tut ils posts sajan stads occupads tut ils trais dis.
Nus avain duvrà la solidaritad da la glieud ch'è s'annunziada er anc a curta vista u ch'èn sa decididas da surprender anc ina servetsch dapli. Nus essans fitg engraziaivels a quellas persunas.