Il mars ha il chantun Grischun registrà 983 persunas dischoccupadas. Quai correspundia ad ina quota da dischoccupaziun da 0,9%, scriva il chantun. Envers il mais precedent cun 1'047 persunas dischoccupadas è il dumber da persunas dischoccupadas sa reducì per 64. Ultra da quai èn vegnidas registradas 1'002 persunas che tschertgan ina plazza che n'èn betg dischoccupadas.
Da las 983 persunas dischoccupadas eran 351 dunnas e 632 umens. Il dumber il pli aut da las persunas dischoccupadas han registrà l’industria da construcziun (209), l’hotellaria (168), ils fatgs da sanadad e socials (78) sco er il commerzi en detagl (63).
Il mars 2024 han ins dumbrà 41 persunas dischoccupadas per lunga durada. En cumparegliaziun cun il mais precedent cun 37 dischoccupads da lunga durada è quest dumber creschì levamain.
En l'entira Svizra è il dumber dals dischoccupads sa reducì da 111'879 sin 108'593. La quota svizra da dischoccupaziun munta a 2,4%. En l'entira Svizra èn vegnidas registradas supplementarmain 69'799 persunas che tschertgan ina plazza ch'e n'èn betg dischoccupadas.
Lavur curta
La fin da mars 2024 avevan en tut sis manaschis ina permissiun currenta per pudair quintar giu l’indemnisaziun per lavur reducida. Maximalmain pudessan 406 lavurantas e lavurants esser pertutgads. En cumparegliaziun cun il mais precedent cun medemamain sis manaschis e 405 collavuraturas e collavuraturs ch’èn eventualmain pertutgads è quest dumber restà constant. Questas indicaziuns na permettan betg da suandar exactamain las interpresas che lavuran a curta vista, perquai che quellas han a partir da la perioda da rendaquint respectiva trais mais temp da far valair lur dretg d’indemnisaziun per lavur reducida tar differentas cassas da dischoccupads.
