Pervi da l'obligaziun da lavurar da chasa anora porscha er la cussegliaziun da professiun ses servetsch a moda digitala. Enstagl ch'ils giuvenils van tar la cussegliadra u tar il cussegliader en il biro regiunal, datti ina cussegliaziun per telefon u video. Tut ils meds digitals che funcziunan e gidan vegnan nizzegiads. Annette Decurtins e ses collegas da lavur han constatà ch'ils giuvenils han ramassà l'ultim onn las abilitads da duvrar quels meds. En general sajan ils resuns buns.
Malgrà la pandemia sajan las dumondas dals giuvenils restadas las medemas, sco Annette Decurtins declera. Per part hajan ils giuvenils gì fadia da chattar in lieu da fufragnadi ed en consequenza hajan quels tema da betg chattar ina plazza d'emprendissadi. Qua po la cussegliadra però quietar:
Il dumber da plazzas publitgadas è varià mo minimalmain. Per il 2021 eran 971 plazzas publitgadas, e quai èn mo 39 damain che l'onn avant.
A giuvenils ch'èn en tschertga d'ina plazza d'emprendissadi cusseglia la dunna dal fatg da tschertgar il discurs cun manaschis u emprendistas ed emprendists pli vegls sco er da s'infurmar sin www.cussegliaziun.ch.