Tgi che tschertga da prender a fit in’abitaziun u ina chasa en il Grischun sto pajar marcantamain dapli ch’anc avant in onn. En nagin auter chantun èn ils tschains creschids uschè fitg sco tar nus. Quai mussan las novas cifras dal portal Homegate.
Guardà sin l’entira Svizra èn ils pretschs per abitaziuns creschids 2022 en media per 2,8%. Dapi ch’ins ha cumenzà a registrar las datas l’onn 2009 n’hai anc mai dà in uschè grond plus. En il Grischun è quai dentant anc marcantamain dapli: 6,7% – in record.
Homegate declera quai cun il giavisch fitg derasà da posseder in’abitaziun da vacanzas. Dà schlantsch a quest trend han surtut la pandemia e las pussaivladads da far home-office. Ulteriuras raschuns èn dentant era l’iniziativa da segundas abitaziuns e la lescha per la planisaziun dal territori. Tenor las datas da l’Uffizi federal da statistica datti il mument era strusch abitaziuns vitas en il Grischun.
