Ins duai pudair stgarpar giu, bajegiar da nov, sanar ed engrondir fin in tschert punct chasas ch'èn vegnidas construidas avant il mars 2012 ed utilisar quellas senza restricziuns.
En il futur duai per exempel esser lubì da stgarpar giu in bajetg vegl, engrondir quel per 30% da la surfatscha e construir il bajetg nov insanua auter sin la parcella. Las novas abitaziuns n'èn lura betg pli suttamessas a la lescha davart las abitaziuns secundaras.
Schanza u ristga? – architects cun opiniuns divididas
Entant ch'ils ins vesan l'adattaziun da la lescha sco schanza, vesan auters ina gronda ristga. Uschia per exempel l'architect Riet Fanzun da Tarasp. El s'engascha sco co-president da l'uniun Anna Florin per dapli spazi d'abitar per indigens. I saja bun ch'i dettia uss in midament, ma quel stuess ir en la direcziun ch'ins promovia emprimas abitaziuns e betg segundas abitaziuns. Ussa vegnia anc ina giada tschertgà ina soluziun da promover anc dapli segundas abitaziuns, uschia Riet Fanzun. Las consequenzas vegnian ad esser che las segundas abitaziuns vegnian anc a prender dapli suramaun, ils pretschs da las segundas abitaziuns giajan anc pli ad aut. Uschia vegnia anc a dar pli pauc spazi da viver per indigenas ed indigens en las vischnancas.
L'architect da Samedan, Patrick Blarer, è led che la lescha vegn schluccada. El vesa il grond avantatg che la surfatscha possia uss vegnir nizzegiada meglier. Garanzia che quai vegnia a schabegiar na possia el dentant dar nagina. El vesa la schluccada da la lescha en emprima lingia sco precisaziun da l'applicaziun da la lescha da segundas abitaziuns. El chapeschia dentant er ils dubis.
Regenza grischuna è cuntenta
La regenza grischuna sa mussa cuntenta, ella ha sustegnì la schluccada da la lescha. Il cusseglier guvernativ Marcus Caduff vesa quai sco schanza. Il tema da mancanza d'emprimas abitaziuns saja virulent e gia sin maisa. Cun quella decisiun na vesia el betg ch'il problem vegnia pli grond – anzi el vesia plitost la schanza ch'ins possia forsa dir: Cun ina part fan ins segundas abitaziuns, dentant cun il rest fan ins emprimas abitaziuns. Plinavant hajan las vischnancas en maun instruments ch'ellas possian intervegnir.
Sch'i na dat nagin referendum pudess la nova lescha ir en vigur sin l'entschatta dal 2025.
