Siglir tar il cuntegn

Header

cuntegn

Accusaziun Orlando Zegg – malduvrà l’autoritad sco derschader?

En duas emnas stat Orlando Zegg avant dretgira pervi dad abus d’uffizi. Il derschader haja flaivlentà aposta la posiziun dal whistleblower Adam Quadroni, scriva il procuratur public en l’acta d'accusaziun.

Orlando Zegg è il president da la dretgira regiunala Engiadina Bassa Val Müstair. En questa funcziun ha el prendì pliras decisiuns areguard la separaziun dad Adam Quadroni da sia dunna. L’accusaziun d’abus d’uffizi pertutga ina da questas decisiuns.

Orlando Zegg
Legenda: Orlando Zegg President da la dretgira regiunala Engiadina Bassa Val Müstair MAD, Mayk Wendt

Per examinar il cas han ins incumbensà in procuratur public extraordinari dad ordaifer il Grischun. Quel pretenda il suandant chasti:

  • chasti en daner cundiziunà da 60 schurnadas à 260 francs
  • multa da 3'500 francs

Giuditgada vegn la chaussa da la dretgira regiunala Partenz Tavau. Il process ha lieu ils 16 da settember. I vala la presumziun d’innocenza per Orlando Zegg. El refusa tut las renfatschasenvers sia persuna e pledescha sin innocent.

audio
Claudia Cadruvi metta a lieu il cas
04:12 min, Actualitad dals 01.09.2021.
laschar ir. Durada: 04:12 minutas.

Per tge vai insumma?

Avant quatter onns ha la polizia manà atras ina acziun tar Adam Quadroni. Tenor l’acta d’accusaziun sa tractavi dad ir per rauba che appartegneva a sia dunna, ma era rauba dals uffants. La decisiun da dar ora la rauba n’aveva dentant nagina vigur legala. Adam Quadroni ha pudì mussar ora gliez a la polizia cun in scriver da la dretgira chantunala.

audio
Per tadlar curt e cumpact
01:26 min, Novitads dals 01.09.2021.
laschar ir. Durada: 01:26 minutas.

Dà ordras senza cumpetenza

La polizia ha perquai interrut l’acziun ed è sa drizzada a la dretgira regiunala Engiadina Bassa Val Müstair. Il derschader regiunal Orlando Zegg haja dà las ordras da cuntinuar cun l’acziun, gliez malgrà ch’el na saja betg stà cumpetent e malgrà che la dretgira regiunala aveva era retschavì il scriver da la dretgira chantunala, scriva il procuratur.

Orlando Zegg haja perfin dà da chapir a la polizia che quest proceder saja coordinà cun la dretgira chantunala. Il derschader regiunal ha era tramess l’actuara da dretgira tar la chasa dad Adam Quadroni per ch’ella surveglia che l’acziun da polizia succedia tenor sias ordras.

Prendì en cumpra escalaziun

Adam Quadroni è s’opponì – cun raschun – cura che la polizia è turnada tar el. La polizia ha mess el ed era sia sora ch’era preschenta preventivamain en manuttas. En quest connex scriva il procuratur public ch’il derschader haja sminà che l’acziun escaleschia. El haja prendì en cumpra mesiras da sforz nunnecessarias e tut tenor era nungiustifitgadas.

La polizia, la dunna, l’actuara e gidanters èn entrads en la chasa – e perfin en il biro ed en l’abitaziun dals geniturs dad Adam Quadroni. Ins ha allontanà rauba da la dunna e dals uffants.

Flaivlentà la posiziun dal bab

En connex cun las chaussas allontanadas dals uffants scriva il procuratur public: Il derschader Orlando Zegg saja stà pertschert che ses agir flaivlentia – sche betg perfin impussibiliteschia – la schanza dad Adam Quadroni sco bab dad obtegnair il dretg da tgira per ses uffants.

L’acta d’accusaziun finescha cun ils pleds:

El (il derschader) ha agì per smesar la posiziun dad Adam Quadroni en sia procedura da protecziun da la lètg u almain, per procurar ad el difficultads e fastidis massivs.
Autur: ord acta d'accusaziun

Indizis che Orlando Zegg fiss vegnì instrumentalisà dal cartel da construcziun, n’ha il procuratur public chattà nagins durant sia inquisiziun penala.

RTR novitads 06:00

Artitgels legids il pli savens

Scrollar a sanestra Scrollar a dretga