Siglir tar il cuntegn

Header

audio
En la naiv sur la citad a Brambrüesch
Or da Actualitad dals 02.01.2024. Maletg: RTR
laschar ir. Durada: 4 minutas 1 Secunda.
cuntegn

Activitads d’enviern Da la citad ad aut a Brambrüesch en la naiv

En la citad da Cuira èsi enturn Bumaun verd e las temperaturas èn enturn diesch grads. L’enviern è dentant betg dalunsch – si Brambrüesch giauda la glieud la naiv.

Per cuntanscher Brambrüesch van ils sportists e sportistas d’enviern sco emprim cun la gondla gronda enfin il Känzeli e suenter cun la pitschna, cotschna vinavant enfin tar la naiv.

Igl è in di surtratg, il sulegl smatga tras in tic. Las chasas, ils prads ed era las plantas en cuvertas cun naiv ed i ha blera glieud. Il runal porta si cun mintga staffa dus persunas e sutvart spetga ina colonna. Per ina snowboardista è il territori da skis Brambrüesch famigliar e pratic pertge ch'igl è datiers a la citad.

Per mai na datti betg il sport d’enviern senza ir culs skis e cun la aissa. Jau sun leda ch'jau na stoss ir tut il enviern cun la scarsola.
Snowboardista

Ina dunna ch’è creschida si a Savognin è per l’emprima giada en quest pitschen territori ed ella bada natiralmain ina differenza.

Jau abitava adina datiers a la pista. Uss è la pista datiers a la citad – quai è auter, dentant era okay.
Skiunza
Brambrüesch, Schnee, Graubünden
Legenda: Dus amitgas che s'èn vegnidas ad enconuscher ad Hawaii, fan uss in di d'enviern cun la scarsola. RTR

E sin pista èn era diversas gruppas da scolas da skis. In bab spetga sper il runal sin ses figl. L'um da Cuira è sco pitschen era ì cun la aissa a Brambrüesch, pia chattà el quai cool ch’el sa dar vinavant quest gust a ses figl. Durant quest temp va el a far intginas rundas a pe. Sper la pista e las vias d’enviern datti era ina via per scarsolar. Dus giuvnas en pachetadas en vestgids da naiv e cun chapellina e fan gia la secunda runa cun la scarsola. La via saja dentant da glatsch e pli en giu, pli pauca naiv che i haja.

Artitgels legids il pli savens