A Cuira han oz tut ils fans da shopping che possedan la «ChurCard» savì profitar da rabats en differentas butias. Per l'acziun da reclama da la citad da Cuira e Cuira Turissem han ils organisaturs envidà bleras butias da la citad veglia da far part da l'acziun.
participaziun da butias magra
L'invit per mail n'haja dentant betg gì in grond resun, ha declerà la directura da Cuira turissem, Leonie Liesch. Uschia hajan mo 12 butias fatg part da l'acziun. La citad veglia dumbra però circa 80 butias. Retschertgas per telefon hajan mussà, che pliras fatschentas da la citad n'hajan betg gì enconuschientscha da l'acziun. Per l'onn proxim ponderescha Cuira turissem perquai da midar la moda da communitgar talas acziuns e forsa schizunt ir sperasvi persunalmain tar las differentas butias.
RR Telesguard 17.40