La sonda, ils 19 da november han possessurs e possessuras d’armas gì la pussaivladad da dar giu gratuitamain armas e muniziun. 136 persunas hajan nizzegià questa pussaivladad, scriva la Polizia chantunala. 139 buis, pistolas e revolvers en tuttas grondezzas sco era entginas armas exotas sco era blera muniziun ha la polizia prendì encunter. Quai è gia stà la tschintgavla giada en il Grischun che la Polizia chantunala ha rimnà en tut ils posts armas e muniziun. Las armas e muniziun vegnan silsuenter dismessas a moda cumpetenta dal post spezialisà per armas.
En general èsi adina pussaivel da dar giu armas e muniziun tar la Polizia chantunala. Las acziuns da rimnar che vegnan fatgas mintga trais onns duain far attent la populaziun che quai è pussibel. La lescha oblighescha ils chantuns da rimnar gratuitamain armas e muniziun da privats. Avant trais onns han 167 persunas surdà 190 armas e blera muniziun.