Siglir tar il cuntegn

Header

cuntegn

«Adatg!» In zichel in'autra scola da recrut

Avant in'emna ha la scola da recrut puspè cumenzà. Pervia dal coronavirus ha l'armada stuì prender mesiras per garantir la protecziun da mintga recrut. Uschia ch'igl è in zichel ina scola da recrut nunusitada. 3 recruts rumantschs raquintan da lur experientschas.

Avant in'emna ha la scola da recrut da stad cumenzà. En la caserna a Cuira e Son Gliezi èn circa 710 schuldads staziunads. Da quels han 520 recruts fatg lur emprims pass en direcziun vita militara. Pervia dal coronavirus ha l’armada dentant stuì prender mesiras. Tranter auter è ina mascrina durant tut il temp obligatorica.

Test da corona

Tar l’entrada da servetsch han ils recruts stuì far in test da corona, declera il colonel Daniel Steiner da la scola d’infantaria a Cuira. Fin ch’ins ha ils resultats ston tut ils recruts restar en caserna – quai vala er per l’emprima fin d’emna. Sch’ils recruts dastgan turnar a chasa la segunda fin d’emna n’è betg anc cler. Quai saja impurtant per garantir ch’il virus na vegnia betg importà en la caserna.

Pliras mesiras per la segirtad dals recruts

Per garantir la meglra protecziun pussaivla ston ils recruts purtar ina mascrina blaua da protecziun – e quai durant tut il temp. Durant ina ura da sport declera Tim Andri da Müstair:

Chaminar cun la mascrina è fitg stentus. Cunzunt ils davos dis, cura ch’igl è stà chaud.
Autur: Tim Andri recrut da Müstair

E tuttina chapescha el la situaziun. Suenter in temp sa disan ins vid la mascra. Il fatg ch’el sto restar en caserna sur la fin d’emna n’è betg in problem per el. El manegia che blers recruts hajan chapientscha per la situaziun.

audio
Recruta sut cundiziuns specialas pervia dal coronavirus
ord Actualitad dals 06.07.2020.
laschar ir. Durada: 5 minutas 38 Secundas.

Mesiras tut a dubel

La protecziun dals recruts ha la pli gronda prioritad, declera il colonel Daniel Steiner. Ins haja installà staziuns per dischinfectar ils maun. Vinavant stoppia il chau-secziun resguardar che la distanza tranter ils recruts vegnia tegnida en.

Nus empruvain da porscher ina scola da recruta normala – simplamain cun dapli distanza e mascra.
Autur: Daniel Steiner colonel

Era durant la tschaina ed il gentar dastgan be mintgamai dus recruts seser vid ina maisa. Ultra da quai vegnan ils recruts tar la recepziun ed en cuschina protegids cun in vaider da plastic.

En direcziun da daventar in um

Per ils recruts rumantschs Christian Toutsch, Flavio Gottschalk e Tim Andri hai num sa disar vid la vita militara. En l’armada sajan ins per part sur sasez.

En l’armada n’è la mamma betg denturn.
Autur: Christian Toutsch recrut da Zernez

Tuts sajan dentant cuntents cun lur sergents e litinents. Els dettian cumonds clers, hajan dentant era chapientscha, sch’ins fa anc sbagls l’entschatta. Per exempel tar il «s’annunziar» u sch’i va per l'emconuschientscha dals differents grads militars. Percunter plaschan a tuts ils exercizis cun l’arma persunala. Suenter l’emprima emna fan els ina buna bilantscha e sa legran sin ils proxims mais.

RTR actualitad 07:00

Artitgels legids il pli savens