Il post spezialisà dal Grischun per sanadad sexuala e planisaziun da famiglia «Adebar» fa attent che la situaziun actuala è alarmanta. Adebar è cun il project «curaschi» adina puspè en differentas scolas dal chantun Grischun per la prevenziun d'abus sexual. A las persunas spezialisadas saja dà en egl che adina dapli uffants raquintan da mulestas sexualas en las medias socialas. Quai saja stà il motiv per il post da far attent sin la problematica.
Nus stuain chalar da be stizzar il fieu e mirar ch'i n'arda betg pli.
Mirar sin il problem e na betg mirar davent è lur devisa. Cunzunt durant la pandemia nizzegian adina dapli uffants, giuvenils e giuvenilas las medias socialas per restar en contact. In studi da la Scola auta turitgaisa per scienzas applitgadas, ZHAW, dal 2020 mussa che bunamain la mesadad dals giuvenils e las giuvenilas sajan gia vegnids contactads da persunas estras cun intenziuns sexualas. Tar las giuvnas è la cumpart dubel uschè gronda sco tar ils giuvens.
Adebar fa attent ch'ils uffants e la giuventetgna na raquintan savens betg dals cas ed hajan tema da tschertgar agid. Il motiv saja savens la tema che las medias socialas vegnissan uschia scumandadas ad els.