Ensemen èn els stads 24 onns en il Cussegl grond: Silvia Casutt 12 onns, Duosch Fadri Felix 8 onns e Roman Cantieni 4 onns. Silvia Casutt n'ha perquai betg anc ina giada candidà ed ha uschia pudì sa preparar mentalmain sin quels davos dis. Per ella èsi la fin da sia carriera politica.
Blers muments restan en memoria, saja quai polticamain u er privat. Cunzunt ils contacts sur las partidas vegnan a mancar.
Auter guardi or tar Duosch Fadri Felix e Roman Cantieni – els n'èn omadus betg pli vegnids reelegids e ston uss prender cumià durant questa davosa sessiun da la legislatura. Duosch Fadri Felix è daventà unfrenda dal nov sistem d'eleger e sto dar adia al Cussegl grond per ils proxims quatter onns. Probablamain candideschia el en quatter onns puspè.
Betg mintga sessiun, dentant bleras sessiuns han gì highlights.
Roman Cantieni entant ha schizunt midà partida, da la PCD lura anc tar la PS per avair dapli schanzas per sia emprima elecziun. Quai n'è dentant betg gartegià e perquai na sappia el uss er anc betg co e sche sia carriera politica duai cuntinuar.
Il pli grond plaschair hai jau gì che la scola media d'informatica è vegnida tras e ch'jau dastg uss sco mainascola introducir quella en Surselva.
La pli veglia prenda cumià
Cumià prendan blers – ina è dentant anc da menziunar: Nicoletta Noi-Togni, ella che vegn questa stad 82 onns veglia ed è uschè er stada la veglia en il Cussegl grond. Ella, ch'è gia stada en il Cussegl grond la fin dals onns 80 ed il cumenzament dals onns 90 ed uss dapi il 1997 en uffizi. Ella po bandunar la sala dal Cussegl grond cun bleras bunas memorias. Adina haja ella stuì lavurar bler e cumbatter fermamain per quai ch'ella ha vulì – sco dunna dentant er sco minoritad linguistica e senza partida. Sia carriera politica na prenda dentant anc betg ina fin cun la fin da questa legislatura. Nicoletta Noi-Togni è numnadamain anc elegida sco presidenta communala da San Vittore – e quai fin il 2024.