En tut ha l'organisaziun d'agid investì 130'000 francs per agid en furma da rauba e finanzas. Tranter auter datti sustegn tar ils custs da sanadad, tar scolaziuns u er per rauba da scola u promoziun per uffants. Er han 300 famiglias e persunas singulas survegnì in daner da Nadal. Cumpareglià cun l'onn 2020/2021 èn las dumondas d'agid idas enavos in zic. Durant la pandemia eran quellas sa reducidas fermamain. L'onn 2019 aveva l'Agid d'enviern dal Grischun sustegnì passa 250 cas, l'onn 2018 passa 260. Daco che las dumondas èn idas enavos durant la pandemia, na po la presidenta da la fundaziun Tina Gartmann-Albin betg propi declerar, ins haja ensasez quintà cun dapli dumondas pervi da la situaziun da pandemia.
Jau na sai betg, jau na ma poss betg declerar pertge ch'igl è pli paucas. Nus essan ids or dad autras premissas.
Per l'onn da fatschenta current quinta l'Agid d'enviern dentant cun dapli dumondas. Cunzunt pervi dals custs per energia ed auters products ch'èn creschids. Per l'Agid d'enviern saja er pussaivel da dar dapli sustegn, las reservas sajan avant maun, uschia Tina Gartmann-Albin. Er il mainagestiun Jürg Buchli quinta ch'ils custs accessorics pudessan siglientar in u l'auter budget l'enviern che vegn.
Sch'ina mamma ch'educhescha persula ses uffants survegn in quint ch'ella n'ha betg spetgà, per exempel in quint da dentist dals uffants che siglienta simplamain il budget – quai èn ils cas nua che nus gidain.
Ins duai en scadin cas dumandar per agid sch'ins dovria. Gist en las regiuns periferas vegnia quai fatg pauc, perquai che mintgin enconuscha mintgin. Las bleras dumondas vegnan perquai er da la regiun tranter Landquart e Tusaun.
Cas che han survegnì sustegn 2021/2022
Acziuns (p.ex. acziun da Nadal) | 308 |
Scolaziun e furmaziun supplementara | 11 |
Vacanzas e temp liber | 6 |
Custs da sanadad | 28 |
Uffants (incl. equipament da scola e promoziun) | 51 |
Vestgadira | 6 |
Custs d'abitar / rauba da chasa | 32 |
Auter | 29 |