Siglir tar il cuntegn

Header

cuntegn

Agid social meglier Da 13 propostas d'in studi vul il chantun realisar 10

Cun intginas adattaziuns po il sistem da l'agid social en il Grischun cuntinuar. A questa conclusiun vegn in studi da la Scola auta spezialisada da la Svizra Orientala – ch'il chantun ha laschà far. Sviluppar vinavant l'agid social è la finamira dal chantun.

Il studi incumbensà dal chantun ha identifitgà 13 pussaivladads per sviluppar vinavant l'agid social. 10 da las pussaivladads vul il chantun realisar.

Las midadas a curta vista vegnan realisadas tranter il 2025-2028. In register digital per ils cas socials duai far pli simpel la collavuraziun tranter chantun e vischnancas, ch'han da pajar agid social. Ed a conferenzas regiunalas duain acturas e chantun pudair sa barattar e coordinar.

Ils custs per cussegliar ed accumpagnar duain en il futur il chantun e las vischnancas pajar mez e mez. Er ulteriurs custs duain vegnir partids si, quai dentant a media vista.

Questas mesiras pudessan cuzzar pli ditg

La repartiziun tranter vischnancas pudess esser in tema a pli lunga vista. Il studi propona da parter si er ils custs da l'agid social per medemas parts, e che vischnancas che pajan bler agid social, vegnan sustegnidas. Davart dal chantun haja quai dentant la pli bassa prioritad.

A lunga vista vul il chantun er guardar che ses persunal n'ha betg da tractar memia blers cas. Quai possia succeder en connex cun il nov register da cas digital. Er d'engaschar dapli persunal vul il chantun discutar.

Quai na vul il chantun betg ademplir

Il studi propona, ch'i fiss pli simpel per persunas che dovran agid social, sch'il chantun pajass er ora l'agid social, e ch'ellas stuessan far tar quel lur dumonda. En il mument ston els far la dumonda tar la vischnanca. Il chantun na vul dentant betg midar quai.

D'integrar differentas purschidas, sco cussegliaziun da geniturs, Pro Infirmis eav. en ils centers d'agid social, na vul il chantun er betg far. La relaziun dals custs, cumpareglià cun il niz da quai, na saja betg gronda avunda. Er na vul il chantun betg introducir ina decisiun preliminara davart las dumondas per agid social, ch'il studi propona.

Er da far pli enconuschent l'agid social cun reclama ed occurrenzas desista il chantun. En vista media vul el anc ina giada examinar questa pussaivladad.

A curta vista vegn il chantun a midar il num da l'agid social. Nov na vegnan las localitads betg pli ad avair num «Sozialdienst», mabain «Sozial- und Beratungszentren». Er quai è ina proposta dal studi.

En general concluda il studi che l'organisaziun da l'agid social en il Grischun è mess si bun. In sistem cumplettamain communal sco a Son Gagl, u cumplettamain chantunal sco a Glaruna, na saja betg adattà per il chantun.

RTR novitads 09:00

Artitgels legids il pli savens