Schi va per chaschunar emissiuns da gas cun effect da serra – lura tutga l'agricultura tar ils top 4 da la Svizra. Cun 13% da las emissiuns vegn l'agricultura gist suenter il traffic, l'industria e las chasadas. Perquai saja cler ch'ins haja d'agir.
Uschia è naschì – sin iniziativa da la branscha sezza – in project da pilot en il Grischun, il project «Agricultura neutrala al clima Grischun». En quel rom mettan 50 purs e puras sur ils proxims 5 onns en pratica la teoria – quella è per gronda part gia avant maun. Uschia vulan purs e puras chattar ora, tge che funcziunescha e tge betg. Las praticas che sa cumprovan durant ils proxims 5 onns duajan suenter vegnir surpigliadas da tut ils purs grischuns.
La motivaziun è gronda, perquai che las puras ed ils purs na chaschunan betg mo il problem – els pateschan era dal problem. Da lavurar cun la natira è vegnì pli pretensius ils davos onns cun aura adina pli extrema. Perquai saja uss nairas uras d'agir. Da quel avis è era il chantun che sustegna il project da pilot cun 6,4 milliuns francs.
