Cun il cumenzament da l'onn 2020 sa mida la producziun da vin dal Plantahof: A partir da lura vegn cultivà be pli tenor las directivas da Bio Suisse. Quai scriva il Plantahof en ina communicaziun a las medias.
Suenter 2 onns mo bio
Midar vi cumplettamain a la producziun biologica dovria cun cultivaziun e certificaziun 2 onns, declera il Plantahof. Lura saja l'entira purschida da vin da qualitad bio.
Il Plantahof cultivescha a Malans ina vigna da 2,5 hectaras. Torcladas vegnissan las ivas en il tschaler da vin a Landquart.
Dapli bio – per ambient e consument
Cun questa midada veglia il Plantahof sustegnair la strategia biologica da la federaziun da branscha «graubündenWEIN». Actualmain vegnan cultivadas radund 15% da las vignas tenor directivas biologicas. Fin l'onn 2025 duai questa part s'augmentar ad almain 25%.
Tractar l'ambient cun quità, la conscienza per ils connexs e per la circulaziun ecologica sco er duvrar sistematicamain meds biologics per proteger las plantas, quai è da princip la basa d'ina viticultura persistenta.
Quest augment correspundia ultra da quai er a la tendenza naziunala: Adina dapli consumentas e consuments dumandan products ed uschia er vin, che sajan producì tenor las directivas da bio.
RR novitads 10:00+