Siglir tar il cuntegn

Header

video
Coss: nova soluziun cunter l'invasiun
Or da Telesguard dals 05.05.2022.
laschar ir. Durada: 4 minutas 5 Secundas.
cuntegn

Agroscope Finì cun invasiuns da coss?

Dapi onns vegnan empruvadas differentas metodas per cumbatter la derasaziun dals coss en il Grischun. Uss mussan tests a Furna en il Partenz resultats empermettents. RTR ha fatg ina visita.

En teams da dus èn las persunas dal Plantahof e da Agroscope sa furadas parcella per parcella d'ina costa da test a Furna siador, per chavar suenter coss. Uschia pon ins cumparegliar: Quants coss èn da chattar sin las parcellas ch'ins ha tractà cun il bulieu, e quants sin las parcellas ch'ins n'ha betg tractà. Ed il resultat intgantescha l'entolog dad Agroscope Christian Schweizer: «Quai stuais vesair, sin questa parcella tractada cun il bulieu avain nus be chattà in coss vivent ed in coss cun bulieu», di el e tegna il mussament, ils coss, en la camera. Tut auter guarda quai or sin las parcellas che n'èn betg vegnidas tractadas: «18... 19... 20... Quai èn blers coss, sch'ins fa il quint, fa quai 80 coss per parcella e donns datti gia tar 20 fin 40 coss.

audio
Nova strategia per far frunt als coss
ord Actualitad dals 05.05.2022.
laschar ir. Durada: 3 minutas 28 Secundas.

Da costas brinas tar verdas

La differenza da parcellas tractadas cun il bulieu e quellas senza vesan ins per part gia ad egl: Quellas cun blers coss èn bler pli brinas, perquai ch'ils coss maglian las ragischs dal pastg. Las verdas èn quellas cun il bulieu.

Igl è stà la davosa chavada da test sin il prà a Furna, e cun il resultat è Christian Schweizer cuntent. La finamira saja stada da reducir il dumber da coss per tranter 75 ed 80% «e quella finamira avain nus garantì cuntanschì». Ins vesia er, ch'il bulieu saja sa derasà er per exempel cun la plievgia. Quai saja in bun segn, uschia haja il bulieu er contaminà coss en la vischinanza. Suenter in tractament cun il bulieu avess il pur lura d'avair ruaus da coss per trais generaziuns, pia per tranter 12 e 15 onns. Quest argument ha persvadì il pur da Furna Roman Egli da laschar tractar insaquantas da sias hectaras cun il bulieu: «Jau crai che quai è il dretg med per il futur, perquai che la situaziun cun ils coss è in «saich», nus na perdain betg be la racolta, mabain tut tenor avain nus er da cumbatter cun erosiun.»

Bainbaud ina purschida per tuts?

Er Batist Spinatsch dal Plantahof è cuntent cun ils resultats. Uschia sajan ins er in pass pli datiers a la lubientscha da l'Uffizi federal d'agricultura. «Quai product n'è anc betg lubì da la Confederaziun, cun questa emprova che nus faschain qua, essan nus sin buna via.» El quinta da pudair duvrar il bulieu umid a partir da la primavaira 2023 per tut ils purs en il Grischun che vulan gugent empustar uschè in tractament.

RTR actualitad 17:00

Artitgels legids il pli savens