La Verda, ils verd-liberals e la Partida socialdemocratica dal Grischun èn danovamain s’unids ad ina colliaziun da glistas per las elecziuns federalas dals 22 d’october. Cun quai vulan las partidas dar paisa a la politica da clima en il chantun da turissem e da muntogna, sco che las partidas han communitgà.
La finamira da l'uschenumnada «Allianza dal clima» saja da dar ina paisa maximala a las vuschs che giavischian ina politica ecologica e progressiva, hai num vinavant. Las trais partidas èn avertas per ulteriurs partenaris da colliaziun da glistas.
Matematicamain avain nus be ina schanza sin in sez en il Cussegl naziunal sche nus ans colliain ad ina «Allianza dal clima» cun la PS e la Verda.
Gia per la quarta giada ina allianza cun la sanestra
Gia il 2011, il 2015 ed il 2019 è la Partida verd-liberala dal Grischun sa colliada cun la sanestra, quai cuntrari a la strategia naziunala ed ad auters chantuns. Il 2011 eri cun questa strategia perfin reussì da recaltgar in sez verd-liberal, quai cun Josias Gasser. Restà a Berna è el dentant be ina legislatura.
Il 2019 ha l'allianza da PS, Verda e verd-liberals puspè gì success, questa giada cun recaltgar in segund sez socialdemocratic cun Sandra Locher Benguerel. L'ambiziun dals verd-liberals era stada lura da turnar enavos en il Cussegl naziunal e quai anc ina giada cun lur candidat Josias Gasser.
Era quest onn vul la PS defender ses dus sez a Berna. La finamira è clera:
Nus vulain en mintga cas impedir che la PPS survegn quest sez. Nus cumbattain per noss segund sez ma essan era pertschert ch'ils verd-liberals pudessan surprender quel.
Cursa stretga per il tschintgavel sez
Avant quatter onns n'hai betg mancà uschè bler che ils verd-liberals avessan fatg il tschintgavel sez enstagl da Sandra Locher Benguerel. Cunquai che lezza na candidescha betg s'augmentan las schanzas verd-liberalas da gudagnar quest sez cun Géraldine Danuser. Igl è dentant tut auter che segir che l'Allianza dal clima segirescha dus sezs. Avant quatter onns è la Partida populara svizra betg stada uschè lunsch davent cun lur dumber da vuschs. La cursa per il tschintgavel sez vegn probabel er questa giada ad esser stretga.
L'Allianza dal Center è trumpada
Era els avessan gugent vulì sa colliar cun la partida verd-liberala. Ed els sajan trumpads, di il co-president da l'Allianza dal Center Kevin Brunold. Ussa sajan els en discurs cun autras partidas burgaisas. Sisum sin la glista sajan ils liberaldemocrats, dentant era las partidas dretgas PPS e la Partida evangelica grischuna pudessan esser pussiblas partenarias da colliaziun. Ubain ch'els restan insumma dal tut sulets, lezza varianta dettia senz'auter era anc.
Ulteriura colliaziun cun glista da Hans Vetsch
L'onn passà ha el candidà per la regenza, l'atun candidescha el cun in'atgna glista da Grischuns libers ed independents.
Hans Vetsch va en cun sia glista ina colliaziun da glistas cun l'Allianza dal clima, pia la PS, la partida verd-liberala e la verda. Hans Vetsch ha l'onn passà candidà per la regenza, l'atun candidescha el cun in'atgna glista da Grischuns e Grischunas libras ed independentas tar las elecziuns dal Cussegl naziunal.
Cun extender l'Allianza dal clima megliereschian ils partenaris la schanza d'avair success tar las elecziuns dal Cussegl naziunal, scriva l'allianza en ina communicaziun.
Or da l'archiv
