Siglir tar il cuntegn

Header

audio
Tge strategia vulan ils delegads e las delegadas per las elecziuns?
Or da Actualitad dals 25.08.2021.
laschar ir. Durada: 03:19 minutas.
cuntegn

Allianza dal center Ir en il cumbat cun ina dunna – ma da tge regiun?

Trais sezs occupescha l’allianza dal center en la regenza grischuna. La suprastanza na vul anc betg dir sche la nova partida emprova da defender il 2022 ils trais sezs u sa cuntenta cun mo dus sezs.

Ier a la radunanza da delegads n’ha il co-president Kevin Brunold tradì nagut davart il cumbat electoral. Be tant: Il november u december duain ils delegads nominar las candidaturas per la regenza.

Ils dus cussegliers guvernativs Marcus Caduff e Jon Domenic Parolini sa mettian puspè a disposiziun per in ulteriura perioda d’uffizi, ha ditg il co-president. Mario Cavigelli chala suenter 12 onns en la regenza.

Plain anim da cumbat

RTR ha fatg ina pitschna retschertga a chaschun da la radunanza da delegads. Tut las delegadas ed ils delegads ch’èn s’exprimids mussan anim da cumbat: L’allianza dal center stoppia empruvar da defender ils trais sezs.

Mo sch’ins va en il cumbat san ins gudagnar – quai enconuschan ins dal sport
Autur: Fabian Collenberg, suppleant da la Cadi

I dovra pia anc ina terza candidatura, sper ils dus candidats en uffizi. Ha questa candidatura da derivar ord las retschas dals oriunds cristiandemocrats u burgaisdemocrats. Quai na gioghia nagina rolla, basta che la persuna saja qualifitgada e cumpetenta, uschia il tenor.

Pericliteschan dunnas ils magistrats en uffizi?

La terza candidatura da l’Allianza dal Center duai esser ina dunna, dian ils delegads e las delegadas ch’èn s’exprimids envers RTR. Nums concrets na less dentan negin numnar anc uss.

Cumpetentas e qualifitgadas fissan per exempel la deputada e presidenta communala da Glion Carmelia Maissen u era la deputada Aita Zanetti da Sent.

Las duas dunnas derivan dentant exact da las medemas regiuns sco Jon Domenic Parolini e Marcus Caduff che battan la primavaira 2022 per in’ulteriura perioda d’uffizi. Quai vul dir: Ils cussegliers en uffizi survegnessan concurrenza gist avant porta.

RTR actualitad 12:00

Artitgels legids il pli savens

Scrollar a sanestra Scrollar a dretga