Siglir tar il cuntegn

Header

audio
Reglas per campar selvadi
Or da Actualitad dals 05.08.2022.
laschar ir. Durada: 3 minutas 20 Secundas.
cuntegn

Alpinissem Dastg'ins campar en la muntogna?

Intgins ed intginas che campeschan ina notg durant ina tura en la muntogna n'èn sez betg segirs sch'i fan insatge scumandà. Auters manegian che mintgin e mintgina haja il dretg da far diever da terren betg cultivà. Igl è grev da savair tge ch'è lubì cun la fulla d’opiniuns, leschas e reglas.

Sch'ins vul ina giada star sur notg en la muntogna en ina tenda u en il satg da durmir, ston ins resguardar in pèr chaussas. Il pli impurtant è da savair nua exact ch'ins vul star sur notg. Ina giada sa decis per in lieu, pon ins sco emprim controllar sin la carta interactiva en la rait sut map.geo.admin.ch, sch'il plaz è en ina zona scumandada. Quai cun activar en la rubrica «natira ed ambient» la carta «procteziun da la natira e da la cuntrada». Igl è en mintga cas scumandà da campar en territoris da schurmetg, sco en il Parc Naziunal Svizzer, sin territoris natirals protegids, en zonas da repaus per selvaschina ed en asils da selvaschina.

Resguardar las reglas da la vischnanca

Da principi è tenor il Cudisch civil svizzer finadina e finadin liber da far diever dals guauds e da las pastiras, quai è l'uschenumnà «dretg dad ina e scadin». La medema lescha dat dentant era la cumpetenza al chantun ed a las vischnancas da restrenscher quest dretg. Uschia regla mintga vischnanca sezza il campar sin ses territori. E las bleras vischnancas han in scumond general da campar ordaifer dals lieus previs.

Entras quest «dretg dad ina e scadin» datti ina zona legala grischa che mintga vischnanca sto adminstrar insaco. Las zonas federalas scumandadas èn definidas, la lescha communala è era lianta. Uschia ch'i dat en tscherts cas ina toleranza si sur il guaud, sch'il campar vegn fatg da moda e maniera discreta. Esser discret munta per l'ina da tschertgar in plaz in pau da la vart, per l'autra munta era da betg campar en gruppas pli grondas durant in lung temp. L'idea è da star sur notg e lura puspè bajegiar giu il camp. Plinavant duain ins evitar da far grondas caneras, da laschar enavos rument e da far fieu en il liber. Mintga nov fieu en la natira lavaga in toc vegetaziun. I vala la regla: «Lascha enavos nagut auter che tes fastizs».

RTR actualitad 07:00

Artitgels legids il pli savens