Siglir tar il cuntegn
Inhalt

Grischun Als fastizs dal Meister da Vuorz

Il «Meister da Vuorz» è in pictur artist che ha embellì en il 14avel tschientaner differentas baselgias en il Grischun. El appartegn als artists ils pli impurtants da ses temp. El n’ha dentant betg mo embellì la baselgia da Vuorz, perquai ses num, mabain era baselgias a Razén, Lüen ed a Cuira.

Sogn Gieri cumbatta il dragun. Fresco dal «Meister da Vuorz» en la baselgia Sogn Gieri a Razén.
Legenda: Sogn Gieri cumbatta il dragun. Fresco dal «Meister da Vuorz» en la baselgia Sogn Gieri a Razén. RTR, Angela Hendry

Ils da Vuorz na vesan betg propi il spezial vi da lur maister, di Horst Rupp, anteriur professer per teologia evangelica a l’universitad da Würzburg. El declera quai cun il fatg, ch’ils da Vuorz èn sa disads da vesair savens las ovras en l’atgna baselgia.

Detagls sensaziunals

Il maister saja bun da raquintar istorgias cun ses maletgs. Ins chattia moviment e schlantsch. Ils detagls sco mauns e pes, ils gests, quai saja simplamain sensaziunal, unic, ch’ins na chattia betg en questa furma tar auters.

Ovra è pli impurtanta che artist

Malgrà che l’artist sto avair gì success da ses temp n’enconuscha nagin ses num, nagin sa, danunder ch’el vegn. Forsa dal Grischun? Da l’Italia, da la regiun da Turitg, da l’Austria? L’artist n’èra betg uschè impurtant, en il center steva l’ovra, declera Rupp. Ed insumma, igl è pussaivel ch’il «Meister da Vuorz» sa numnass artisan e betg artist, cunquai ch’el vegniva incumbensà d’insatgi che scheva, tge ch’el haja da malegiar.

Libertads artisticas

Las ovras dal maister enconuschan ins vi da detagls individuals, di Gerhard Simon, istoricher da la refurmaziun. Las scenas curran ina en l’autra, ils maletgs n’èn betg limitads en in rom. Uschia naschia in maletg viv.

Da sanester: Horst Rupp, participant dal seminari davart il «Meister da Vuorz» e Gerhard Simon.
Legenda: Da sanester: Horst Rupp, participant dal seminari davart il «Meister da Vuorz» e Gerhard Simon. RTR, Angela Hendry

RR actualitad 08:00