Siglir tar il cuntegn

Header

cuntegn

Analisas da segirezza Vischnancas grischunas preparadas per eventualas periclitaziuns

Uss han tut las 101 vischnancas grischunas terminà l'analisa dals privels per la populaziun. Quai communitgescha l'Uffizi chantunal da militar e da protecziun civila. Uschia sajan tut las vischnancas grischunas preparadas per eventualas periclitaziuns.

Questa analisa da periclitaziun hajan las vischnancas fatg en stretga collavuraziun cun l'Uffizi da militar e da protecziun civila, l'Uffizi da guaud e privels da la natira e l'Assicuranza d'edifizis dal Grischun. Vitiers haja il chantun installà, scolà e perfecziunà er ils stabs directivs communals durant ils ultims onns. Sin basa da las analisas da periclitaziun fa il chantun uss exercizis ensemen cun ils stabs directivs communals.

Las bovas da Bondo e da Brinzauls hajan mussà, ch'ils stabs directivs communals èn abels da dumagnar gronds eveniments. Tut tenor la situaziun da partenza vegnian els sustegnids – en cas da basegn – dals posts chantunals cumpetents e dal Stab directiv chantunal.

Unic chantun en Svizra

Il Grischun è l'unic chantun, nua che tut las vischnancas han fatg in'analisa da las periclitaziuns. Questas analisas da las periclitaziuns en las vischnancas han era las finamiras da procurar che las commembras ed ils commembers dals stabs directivs communals – e la finala era la populaziun – sajan conscients dals privels pussaivels sco era da preparar mesiras e plans d'urgenza respectivs, sco per exempel concepts d'evacuaziun, d'assistenza e da communicaziun.

Il 2016 è ida en vigur ina lescha chantunala davart la protecziun da la populaziun uschia ch'il chantun e las vischnancas han survegnì l'incumbensa d'identifitgar a temp las ristgas e da prender mesiras. Uss suenter bunamain otg onns è questa analisa vegnida terminada en tut las vischnancas grischunas.

RTR novitads 11:00

Artitgels legids il pli savens