Co fissi cun in cudesch? Nus avain semtgà per Vus in pèr tips da cudeschs rumantschs ch’èn cumparids dacurt. Quels preschenta nossa redactura da litteratura Esther Krättli.
La famiglia Babulin
Dudesch istorgias raquintan dal mintgadi da la famiglia Babulin. Tar ils Babulins n’èsi numnadamain mai quiet u forsa schizunt lungurus. Datti perfin laders tar els? U nua è sparida la turta da nuschs che aug Teo ha purtà? E tgi sa sche l’emprima tarschola che Luisa fa tut suletta gartegia? Nic lava navidas ils dents, el fa bler pli gugent termagls cun la stgima da far la barba da bab. Il giat Brutus ha adina nauscha luna ed il chaun Lupo fa pli gugent patgific che dad ir a spass. Na, tar la famiglia Babulin n’èsi propi mai lungurus.
- «La famiglia Babulin» da Flurina Plouda ed Yvonne Gienal, Lia Rumantscha 2016 (en tut ils idioms ed en RG)
Il buc Charly
Bucs fredan sco quai che bucs fredan. Per plaschair a sia charezzada chaura Alina e per gudagnar ses cor, sa metta il buc Charly a la tschertga d'ina nova odur. Sin ses viadi entaupa Charly ina massa grondiusas e magnificas odurs, ma era tar da quai che savura magari curios e particular. Tgisà tge odur vegn a plaschair a sia charezzada?
«Il buc Charly» da Patrick Mettler e Roger Rhyner (translaziun Francestg Friberg), Chasa editura Baeschlin 2016
ISBN: 978-3-85546-306-0
Ina paraula da Portugal ed Engiadina
'Flur da mandels' è l’istorgia dal giuven Tiago che s’inamurescha da l’Engiadinaisa Aita. Ils dus maridan e van a star en il Portugal. Ma in bel di è Aita malsauna. Ella lascha encrescher per sia patria. Grazia ad ina conchiglia magica reussescha Tiago da curar sia dunna.
'Flur da mandels/Mandelblüten' da Rut Plouda e Peter Horber, edition grischa 2016
ISBN: 978-3-906120-33-1
RR actualitad 08:00