La chasa «Haus zur Kante» è ina chasa veglia cun mirs brins, barcuns stgirs ed in tetg cun si mistgel. Enfin uss han ils blers mo vis la chasa dad ordadora. Uss dentant han la citad da Cuira e la protecziun da la patria grischuna envidà interessads da dar in sguard davos las culissas dal bajetg istoric. Sco igl è vegnì infurmà na datti ils proxims onns anc betg ina soluziun per la chasa ch’è vegnida bajegiada enturn 1700.
Dar in’invista e declerar la dispita
En emprima lingia duai il di da las portas avertas porscher a tut ils interessads in’invista en il bajetg. Plinavant han la citad da Cuira sco era la protecziun da la patria preschentà lur puncts da vista en quai connex. Uschia ha l’inschigner da la citad da Cuira, Roland Arpagaus, declerà il basegns da schlargiar la via da Masans ed uschia stuair stgarpar giu il bajetg «Haus zur Kante». E da l’autra vart ha Christof Dietler, president da la protecziun da la patria grischuna, explitgà la valita istorica da questa chasa. Il bajetg saja in toc identitad per la citad da Cuira e saja ina perditga dal temp.
Anc nagina soluziun
Ils plans da la citad da Cuira da stgarpar giu la chasa avevan ils davos mais procurà per discussiuns. Il cussegl da la citad aveva decidì l’entschatta 2016 ch’il bajetg istoric duaja far plaz per pudair schlargiar la via da Masans. Nua che la chasa stat oz è previs in vial per bus e per velos. Quels plans avevan dentant betg plaschì a tuts. Uschia aveva l’uniun da la citad (Stadtverein) rimnà suttascripziuns encunter il project e la protecziun da la patria grischuna aveva inoltrà in recurs encunter il project. Dapi lura è il project bloccà. Tranter auter sto la cumissiun federala per la tgira da monuments elavurar ina expertisa sch’il bajetg «Haus zur Kante» saja da proteger.
RR novitads 14:00